КъБР-м Граждан жылагъуэ зэгухьэныгъэхэм ядэлэжьэнымрэ лъэпкъ IуэхухэмкIэ и министерствэм иригъэкIуэкIа зэпеуэм щы- те­кIуахэр махуэку кIуам ягъэ­лъэпIащ.
«Адэжь хэкум. Къэбэрдей-Балъкъэрыр зэныбжьэгъугъэмрэ зэгу­рыIуэныгъэмрэ я лъахэщ» респуб­ликэпсо зэпеуэм хэтащ радиом, те­левиденэм, газетхэм я редакцэхэм щы­лажьэ журналистхэр. Ар зы­­хуэгъэп­сар хамэ къэралхэм къыщалъхуауэ зи хэку къэзыгъэзэжа ди лъэпкъэгъухэр ди республикэм ­зэ­ры­щыпсэум, я къуэшхэм зэрахэ­-зэ­гъэ­жым, я IуэхущIафэхэр зыхуэ дэм тетхыхьынырщ, тепсэлъы­хьы­нырщ.
Мы гъэм зэпеуэм цIыху 33-м я лэжьыгъэ ягъэхьат. «Гупыж фщIыуэ ди зэпеуэм фызэрыхэтам щхьэкIэ фIыщIэ фхудощI. Къапщтэмэ, фэ куэдрэ фытотхыхь, фытопсэлъыхь, къывогъэлъагъуэ хамэ щIыпIэхэм ­къикIыжа ди къуэшхэм я Iуэху зыIутыр икIи абыхэм я деж фыкIуэурэ нэтынхэр щывгъэхьэзырыр куэдрэщ. Ахэр хэкужь гъащIэм зэрыхэзэгъэжым и хъы­барым цIыхухэр щызыгъэгъуазэр фэращ. Журналистхэр куэдрэ яхуозэ, я унэхэм макIуэ, редакцэхэм кърагъэблагъэ адэжь лъахэм къэзыгъэ­зэжахэр. Абы къыхэкIыу я гукъы­дэжымрэ мурадхэмрэ, зыхуэныкъуэ­хэмрэ ягу зэрыгъухэмрэ утыку къывохьэф, Iуэху зэIумыбз щыIэмэ, ар гъэзэкIуэжа зэрыхъунымкIэ дэIэпыкъуэгъу фохъу.
Зэпеуэм къевгъэхьа Iэдакъэ­щIэкI­хэм псоми дыкъеджащ, деплъащ, дедэIуащ. Дэтхэнэми гулъытэ щхьэ­хуэ хуэфащэщ, ауэ хабзэм къызэ­ригъэувым тету увыпIэхэр дгуэшащи, ди гуапэу нобэ фыдогъэлъапIэ, дя­пэкIэ дызэдэлэжьэнуи дыхьэзырщ», - жиIащ КъБР-м граждан жылагъуэ ­зэгухьэныгъэхэм ядэлэжьэнымрэ лъэпкъ IуэхухэмкIэ и министрым и ­къалэнхэр пIалъэкIэ зыгъэзащIэ ­КIурашын Анзор.
«Радиом къита нэтын нэхъыфI» лIэужьыгъуэмкIэ япэ увыпIэр хуа­гъэфэщащ журналист МахуэлI ­Хъа­джэт; етIуанэр радиом и лэжьа­кIуэ КIэбышэ Эльмирэ; ещанэр - Теувэжыкъуэ Марианнэ.
«Теленэтын нэхъыфIымкIэ» бжьы­пэр иубыдащ Бжьахъуэ Лолэ ­(1КъБР); ­етIуанэ увыпIэр къихьащ Жылокъуэ Лу­саннэ («Къэбэрдей-­Балъкъэр» КъТРК); ещанэр хуа­гъэфэщащ Нэ­щIэ­пыджэ Замирэ.
ЩIыхь тхылъхэр, саугъэтхэр, удз гъэгъахэр зэпеуэм щытекIуахэм ­яритыжащ КIурашын Анзор икIи журналистхэм я лэжьыгъэ мытыншым щхьэкIэ фIыщIэ яхуищIри, республикэм, къэралым я зыужьыныгъэм сэбэп хуэхъун тхыгъэхэр, нэтынхэр дяпэкIи жыджэру ягъэхьэхьэзырыну ехъуэхъуащ.
Къэбарт Мирэ.