КъБР-м и Парламентым и УнафэщI Егоровэ Татьянэ иджыблагъэ иригъэ­кIуэкIа зэIущIэм, «Правительствэм хухах сыхьэтым» хыхьэу, депутатхэр щы­теп­сэлъыхьащ «Къэбэрдей-Балъкъэр Республикэм физическэ щэнхабзэмрэ спортымкIэ Iуэхухэр зэрыщызэфIахым теухуауэ» КъБР-м и Законыр зэрагъэзащIэм.

Абы теухуауэ зэIущIэм къыщыпсэ­лъащ КъБР-м спортымкIэ и министрым и къалэнхэр зыгъэзащIэ Хьэсанэ Ислъам.
Къэпсэлъам къызэрыхигъэщамкIэ, Къэ­бэрдей-Балъкъэрым спорт ухуэныгъэу 1521-рэ щыIэщ, физическэ щэнхабзэмрэ спортымрэ цIыху нэхъыбэ къы­хэшэнымкIэ мыхьэнэшхуэ ягъэзащIэу. Къищы­нэ­мы­щIауэ, спорт школ 47-м спорт лIэужьыгъуэ 36-м зыщыхуагъасэ щIалэгъуалэ мин 36-м нэблагъэм.
Республикэм лэжьыгъэшхуэ щокIуэкI зи узыншагъэм сэкъат иIэхэр спортымрэ физическэ щэнхабзэмрэ къыхэшэным ехьэ­лIауи, спорт IуэхущIапIэхэр зыхуей щыхуэгъэзэнымкIи.
Хьэсанэм зэрыжиIамкIэ, УФ-м физическэ щэнхабзэмрэ спортымрэ зегъэу­жьы­нымкIэ и къэрал программэм къыщыгъэлъэгъуахэр гъэзэщIэным ипкъ иткIэ, 2020 гъэм ирихьэлIэу процент 23,1-м нагъэсыпхъэщ зи узыншагъэм сэкъат иIэхэм ящыщу физическэ щэнхабзэм хэтхэр.
-2019 гъэм ди спортсмен 600-м спорт цIэ лъапIэхэр къратащ, Урысейм и ныбжьы­щIэ, балигъ спорт гуп къыхэхахэм хагъэ­хьащ 145-рэ. Апхуэдэуи спорт Iуэху­щIапIэ­щIэхэр ухуэнымрэ ахэр Iэмэ­псымэхэмкIэ къызэгъэпэщынымрэ жы­джэру долэжь. Мы зэманым къэралым къиутIыпщ ахъшэ хэлъу IуэхущIапIэ 21-рэ доухуэ, - жиIащ Хьэ­санэм.
Къэралым Къэбэрдей-Балъкъэрым и спорт IуэхущIапIэхэм закъызэрыщIигъа­къуэм и гугъу щищIым, къэпсэлъам жи­Iащ федеральнэ бюджетым къыхэкIыу республикэм субсидие сом мелуан 34-рэ мин 258-рэ къызэрыратар.
Спорт школхэр, спортым щыхуа­гъэ­хьэ­зыр республикэ центрыр, футбол клубыр, бюджет спорт IуэхущIапIэхэр зыхуей ­хуэгъэзэнымрэ зэхьэзэхуэхэр къызэгъэ­пэ­щынымрэ ехьэлIауэ республикэ бюд­жетым къыхагъэкIащ сом 597098-рэ.
Абыхэм къадэкIуэу, гугъуехьхэри зэры­щыIэр къыхигъэщащ къэпсэлъам. Ахэр нэхъыбэу зэпхар адаптивнэ спортым ехьэ­лIауэ IэщIагъэлIхэр зэраримыкъурщ, зи узыншагъэм сэкъат иIэхэр къызыхашэ спорт зэхыхьэхэм я къызэгъэпэщыкIэм арэзы укъызэримыщIырщ (псом хуэмы­-дэу къуажэхэм деж). КъинэмыщIу, языныкъуэ къуажэхэм спорт IуэхущIапIэхэмрэ гъэсакIуэхэмрэ зэрамыIэм къыхэкIыу, щIалэгъуалэм Iэмал яIэкъым абы и лъэныкъуэкIэ заужьыну.
Депутатхэм зэIущIэм къыщагъэлъэ­гъуащ зи гугъу ящIа законыр ехъулIэныгъэ яIэу зэрагъэзэщIэнур. Абыхэм ящыщщ «Готов к труду и обороне» урысейпсо спорт Iуэхум нэхъыбэ къыхэшэныр, щIыналъэ, урысейпсо мыхьэнэ зиIэ зэхыхьэхэр ирагъэкIуэкIыныр, спорт IуэхущIапIэщIэхэр яухуэныр.
Егоровэ Татьянэ къыхигъэщащ республикэм спорт-адаптивнэ секцэхэр къыщы­зэIуахмэ, зи узыншагъэм сэкъат иIэхэм ядэлэжьэфыну IэщIагъэлIхэр яIэн зэры­хуейр. Хьэсанэм жиIащ апхуэдэ IэщIагъэлIхэр щагъэхьэзыр еджапIэ Санкт-Петербург къалэм зэрыщыIэр икIи абы зэрыдэлэжьэнум теухуауэ министерствэм зэгурыIуэныгъэ ирищIылIэну зэримура­дыр.
КъищынэмыщIауэ, Егоровэ Татьянэ щIэупщIащ джэгукIэ зэхуэмыдэхэмкIэ Къэбэрдей-Балъкъэрым и спортсменхэм къагъэлъагъуэу щыта ехъулIэныгъэхэр нэхъ мащIэ щIэхъуам и щхьэусыгъуэм.
Хьэсанэм жиIащ баскетболымкIэ юниор цIыхубз гупым иджыблагъэ ехъулIэныгъэ зэраIар. Абы щыгъуэми, къэпсэлъам къызэрилъытэмкIэ, лъэпощхьэпо мэхъу иджырей мардэхэм тету къызэгъэпэща, спортым и джэгукIэ лIэужьыгъуэхэм зы­щыхуагъэхьэзыр щIыпIэхэр ирикъуу зэрамыIэр.
- Мы зэманым Налшык къалэм и «Искож», «Александровкэ» хьэблэхэм я зэ­хуакум хуэзэу сабийхэр волейбол, баскетбол, футбол мыин щызэдэджэгуну спорт щIыпIэхэр догъэхьэзыр, «База современного пятиборья» проектым хыхьэу, - ды­щIигъужащ къэпсэлъам.
Депутатхэр щIэупщIащ спортым къы­хэкIыжа нэужь, спортсменхэм лэжьапIэ зэрагъуэт щIыкIэм, «Спартак-Налшык» футбол гупым я Iуэху зэрыдэкIым, гъэса­кIуэхэр зэрагъэхьэзырым, зэман гъунэ­гъум ирагъэкIуэкIыну зэхьэзэхуэхэм. Ап­хуэдэуи зэIущIэм хэтахэм къыхагъэщащ «Спартак-Налшык» сабий-ныбжьыщIэ шко­лым и гъэсэнхэм папщIэ губгъуэ IэрыщI яухуэн хуейуэ къазэрыпэщы­лъыр.