ЩэкIуэгъуэм и 1 - 4-хэм «Гладиатор» спорт комплексым щекIуэкIащ дзюдомкIэ «Кубок Вызова Локомотив» V дунейпсо зэхьэзэхуэ. Абы хэтащ зи ныбжьыр илъэси 10 - 13-м ит Урысейм и щIыналъэ 27-м щыщ спортсменхэмрэ хамэ къэрал 12-м къикIа дзюдоистхэмрэ, псори зэгъусэу 1000-м нэблагъэ. Зэхьэзэхуэр къызэригъэпэщащ «Локомотив Грин-Хилл» физкультурэ-спорт зэгухьэныгъэм. Ар диIыгъащ икIи щIэгъэкъуэн хуэхъуащ КъБР-м и Iэтащхьэм и Администрацэм.
Спортсмен ныбжьыщIэхэм ехъуэхъуну икIи ахэр трагъэгушхуэну зэхьэзэхуэр къыщызэIухым кърихьэлIащ КъБР-м и Iэтащхьэ КIуэкIуэ Казбек, «Локомотив» физкультурэ-спорт зэгухьэныгъэм и унафэщI Голдобин Андрей, «РЖД» ОАО-м и тхьэмадэм и чэнджэщэгъу Нагорных Юрий, «Промсвязьбанк» ПАО-м и правленэм и пашэ Фрадков Пётр, Урысейм дзюдомкIэ и федерацэм и вице-президент, Олимп Джэгухэм тIэунейрэ къыщыхэжаныкIа, Урысеймрэ Европэмрэ зыбжанэрэ я чемпион Тменов Тамерлан сымэ, нэгъуэщIхэри.
Спорт комплексым щIэсхэм IэгуауэшхуэкIэ кърагъэблэгъащ зэхьэзэхуэр къыщызэIуахым кърихьэлIа Олимп чемпионхэу Галстян Арсен, Исаев Мансур, Мудрэн Беслъэн, Хъущт Аслъэнбэч, Халмурзаев Хьэсэн сымэ.
-Ныбжьэгъу лъапIэхэ! ПщIэ зыхуэтщI ди хьэщIэхэ! Псом япэрауэ, нобэрей зэхьэзэхуэм хэтхэмрэ ди хьэщIэхэмрэ Къэбэрдей-Балъкъэрым и щIыналъэм фыкъыщызогъэблагъэ. Иджырей зэпеуэр ди республикэм еплIанэу щокIуэкI. Ди дежкIэ пщIэшхуэщ икIи жэуаплыныгъэшхуэ зыпылъщ мыхьэнэшхуэ зиIэ мыпхуэдэ дунейпсо зэхыхьэр едгъэкIуэкIыныр. Ди щIалэгъуалэм, сабийхэм зыкъагъэлъэгъуэну, заужьыну Iэмал зэрыратам къыхэкIыу фIыщIэ яхузощI мы зэхьэзэхуэм и къызэгъэпэщакIуэхэм. Си фIэщ мэхъу нобэрей зэпэщIэтыныгъэхэр удэзыхьэхыу, дахэу, пэжу зэрекIуэкIынур. Дэтхэнэми ехъулIэныгъэ иIэну сынывохъуэхъу. Сыт хуэдэ зэхьэзэхуэри гъащIэ узыншэ ехьэкIыным къыхуезыджэ, зезыгъэужь Iуэхугъуэщ. Нобэрей зэхыхьэри сэбэп хуэхъун хуейщ ди республикэм и мызакъуэу Урысей псом спортым зыщиужьыным, - захуигъэзащ къызэхуэсахэм КIуэкIуэ Казбек.
АдэкIэ псалъэ иратащ Нагорных Юрий: «ПщIэ зыхуэтщI спортсменхэ, тренерхэ, хьэщIэхэ, «Кубок Вызова-Локомотив» дзюдомкIэ V дунейпсо зэхьэзэхуэм и къызэгъэпэщакIуэхэ! Нобэрей зэхыхьэр зыхуэбгъэдэн щыIэкъым, - жиIащ абы - ФIыщIэ яхузощI хэгъэрейхэм республикэм и хьэщIэхэр гуапэу, Iэтауэ къызэрырагъэблэгъам къыхэкIыу. Нобэрей зэхьэзэхуэм ди къэралым и дзюдом и къэкIуэнухэр щызэхуэсащ. НыбжьыщIэхэ, фэ къыхэфха спорт лIэужьыгъуэр нэхъыфIхэм ящыщщ. Дзюдом фыхуигъэсэнущ гушхуэныгъэ фхэлъу, зэгъэкIуауэ фыгупсысэну, IэкIуэлъакIуэу фыкъэхъуну, фи хьэрхуэрэгъум, фи щхьэм пщIэ хуэфщIыну, къалэн зыхуэвгъэувыжрэ, абы ерыщу фыхуэкIуэфу. ФIыщIэшхуэ яхузощI зэхьэзэхуэр къызэзыгъэпэщахэмрэ ар дэзыIыгъахэмрэ. ФIыщIэ щхьэхуэ хуэфащэщ мы зэхыхьэр ипэм къыщыщIэдзауэ иджыри къыздэсым зи пщэ дэлъа, ар зэгъэкIуа хъуным псэемыблэжу телэжьа Джэданэ Алим. Нобэ мы пэшым щIэсщ дзюдоист цIэрыIуэхэр. Абыхэми я цIэр щхьэхуэу къитIуэну къалэжьащ. «Кубок Вызова-Локомотив» дунейпсо зэхьэзэхуэр Налшык щегъэкIуэкIынур хабзэ дахэ хъуащ. АдэкIи къыкIэлъыкIуэ дахэ абы иIэну си гуапэщ».
Тменов Тамерлан къеджащ Урысейм ДзюдомкIэ и федерацэм и президент Анисимов Василий зэхьэзэхуэм хэтхэм къахуигъэхьа хъуэхъу тхыгъэм икIи адэ-кIэ дыщIигъужащ: «ФIыщIэ хузощI си ныбжьэгъу, спортсмен цIэрыIуэ Джэданэ Алим зэпеуэр къызэгъэпэщыным, егъэкIуэкIыным хэлъхьэныгъэшхуэ зэрыхуищIам къыхэкIыу. АдэкIэ къыхэзгъэщыну сыхуейщ къетхьэжьэ Iуэхугъуэхэр къыддэзыIыгь «РЖД» ООО-мрэ «Промсвязьбанк» ПАО-мрэ».
УэрэджыIакIуэ цIэрыIуэхэу Тут Заур, Нэхущ Чэрим сымэ зыхэта концерт гъэлъэгъуэныгъэ удэзыхьэххэм иужькIэ спортсменхэм зэхьэзэхуэм щIадзащ.