КъМР-ни Къурулуш эмда жол мюлк министерствосунда Къытайдан «SINOCONST» компанияны келечилери бла тюбешиу болгъанды. Республиканы жанындан анга министрни къуллугъун толтургъан Татьяны Швачий, «Этана» компанияны башчысы Сергей Ашинов, КъМР-ни Правительствосуну Председателини кенгешчиси Курданланы Узеир, къырал къурулушха надзорлукъ этген департаментни башчысыны къуллугъун толтургъан Хамидби Бориев къатышхандыла, деп билдиргендиле министерстводан.
Россейни бла Къытайны правительстволарыны башчылары буруннгу жыл кюз артында Санкт-Петербургда тюбешгенлеринде, Къабарты-Малкъар Республикада промышленность комплексни къурауну юсюнден келишимге къол салгъан эдиле. Анга тийишлиликде Къытайны миллет нефть-газ корпорациясыны бойсунууунда болгъан компанияла - «China Petroleum Technology and Development Corporation» бла «China Kunlun Contracting and Engineering Corporation» - КъМР-ни Правительствосу бла бирге бизни республикада «Этана» промышленный комплексни къурау жаны бла проектни бардырадыла. Аны чеклеринде бир жылгъа юч миллион тонна полиэтилентерефталат чыгъарыргъа, шешалагъа 60 миллиард литр таза суу къуяргъа эмда транспорт-логистика бёлюмле къураргъа белгиленеди.
2020 жылгъа дери жангы предприятияда ETANAPETI полимер комплекс ишлеп башларыкъды. Ол бир жылгъа 500 минг тонна продукция чыгъарлыкъды. Таза сууну къуюучу оборудование да сынам халда хайырланып тебирерикди. Саулай алып айтханда, бу инвестициялы программа (2021-2030 ж.ж.) беш экижыллыкъ кезиуледе тамамлана барлыкъды.
Татьяна Швачий белгилегенича, бу проект республиканы айныууна, Россейни бла Къытайны арасында экономика байламлыкълагъа да, сёзсюз, бек уллу себеплик этерикди.