Россейде предпринимательликни тарыхыны юсюнден битеуроссей онунчу олимпиаданы регионда кезиуюнде хорлагъанланы бу кюнледе саугъалагъандыла. Аны бла байламлы къууанчлы жыйылыу Къабарты-Малкъар къырал университетде ётгенди. Аны кесин да «Иш кёллю Россей» жамауат биригиуню республикада бёлюмюню башчысыны орунбасары Таумурзаланы Салидат бардыргъанды, деп билдиргендиле ол биригиуден.

Алай бла олимпиаданы регионда кезиуюнде биринчи жерни КъМКъУ-ну экономика бёлюмюню биринчи курсуну окъуучусу Геккиланы Джамиля алгъанды. Экинчиге аны бла бирге ол факультетни студенти Темболат Мишхожев чыкъгъанды, ючюнчюге уа Къабарты-Малкъар къырал аграр университетни теплоэнергетика и теплотехника бёлюмюню биринчи курсунда окъугъан Эльдар Шерхов тийишли болгъанды. Алагъа дипломла, Къабарты-Малкъарны тарыхыны юсюнден китапла, къол бла ишленнген орузламала эмда «Стартум» деген билим бериу арагъа сертификатла бергендиле. 

Иги эсепле кёргюзтген оноуланны да унутмагъандыла: къолларына аллай сертификатла эмда «Купеческие семьи Нальчика. Родовые корни предпринимательства в Кабардино-Балкарии» деген китапчыкъла тутдургъандыла.
Конкурс комиссияны келечилерин да Ыразылыкъ къагъытла бла белгилегендиле. Аланы эмда олимпиадада хорлагъанланы бла ал жерлеге чыкъгъанланы Нальчикни тарых магъаналы жерлерине экскурсиягъа элтирикдиле.