Урысей Федерацэм щIыхь зиIэ и тренер Емкъуж Мухьэмэд и гъэсэн щIалэ иджыблагъэ къыщыхэжаныкIащ Австрием и Линц къалэм дзюдомкIэ Гран-прим хыхьэу щекIуэкIа дунейпсо зэхьэзэхуэм. Ди къэралым и командэ къыхэхам хэту абы зыкъыщызыгъэлъэгъуа Мисиров Исмэхьил зыхэта гупым ещанэ увыпIэр къыщихьащ.

Дунейпсо зэхьэзэхуэшхуэм кърихьэлIащ къэрал 78-м я бэнакIуэу 528-рэ. Килограмм 66-рэ хъухэм я деж Мисировым япэ зэIущIиплIым хухаха зэманхэр и кIэм нимыгъэсу и хьэрхуэрэгъухэм ахэр къафIихьащ.

КIэух зэхьэзэхуэм и Iыхьэ ныкъуэм абы къыпэщIэтащ Японием и дзюдоист лъэщ Хадано Кеито икIи ар къытекIуащ. Абы иужькIэ домбеякъ медалым щIэбэныну ди лъахэгъу щIалэр финал «цIыкIум» ягъэкIуащ. Абдежым ар щыIущIащ Украинэм и бэнакIуэ Голобродькэ Никитэ икIи Киев къалэм къикIа щIалэм къиIэта зэныкъуэкъум щхьэкIэ, судьяхэм ар зэIущIэм хагъэкIын хуей хъуащ. Апхуэдэ щIыкIэкIэ, Мисировыр Австрием ещанэ щыхъуащ.

ТЭМОКЪУЭ Едыдж.