«Студент десант» Iуэхугъуэм ипкъ иткIэ шынагъуэрэ гузэвэгъуэрэ къримыкIуэу гъуэгум тетынымкIэ ГИБДД-м иригъэкIуэкI зэIущIэхэм я зи чэзу щызэхэтащ Налшык къалэм дэт «Къэбэрдей-Балъкъэр гуманитар-техникэ колледжым».
Ар ирагъэкIуэкIащ Госавтоинспекцэм, зи ныбжьыр балигъыпIэм нэмысахэм я IуэхухэмкIэ инспекторхэмрэ Налшык къалэм и УМВД-м и Жылагъуэ советым хэт Фырэ Анфисэрэ.
Госавтоинстпекцэм и лэжьакIуэхэр тепсэлъыхьащ лъэсырыкIуэхэр гъуэгум зэрытет хабзэхэм, абыхэм я къалэнхэмрэ ямыщIапхъэхэмрэ. Зэпкърахащ лъэсырыкIуэхэм яIэщIэкI щыуагъэ къызэрыгуэкIхэр икIи гулъытэ хэха хуащIащ балигъыпIэ имыувахэм машинэ зэрахуэну зэрыхуимытым, абы кърикIуэнкIэ хъуну гузэвэгъуэхэм.
Хабзэхъумэхэм студентхэм ягу къагъэкIыжащ руль удэтIысхьэн ипэ машинэ зэрызэрахуэм хуеджэн зэрыхуейр, автошколыр къызэраухамкIэ щыхьэт тхылъ зэраIапхъэр.
- Машинэр хуит къыфхуэзыщI адэ-анэхэм къагурыIуэн хуейщ фи гъащIэмрэ, зэран фызыхуэхъункIэ хъуну, гъуэгум тет адрей цIыхухэм я гъащIэмкIэ жэуап зэрахьыр. Фи ныбжь нэмысауэ, машинэ зехуэным фызэрыхуеджамкIэ щыхьэт тхылъ фимыIэу руль фыдэтIысхьэну фымыпIащIэ. Зыгуэр къэхъумэ, административнэ тезырыр, дауи, тыжыгъуафIэщ, ауэ узыншагъэмрэ гъащIэмрэ ахъшэкIэ зыми къыхуэщэхуакъым! – захуигъэзащ ныбжьыщIэхэм Фырэ Анфисэ.
ЗэIущIэм кърихьэлIа студентхэм я упщIэхэм жэуап пыухыкIахэр иратащ хабзэхъумэхэм.
Госавтоинспекцэм и
хъыбарегъащIэ IэнатIэ.
