Жеринден тепдирилмеген мюлкню Бирикген къырал реестринде (ЕГРН) чеклени реестри бек магъаналы жерни  алады. Тийишли Миллет системаны къурагъанда аслам информацияны ма андан алгъандыла. Росреестрни Къабарты-Малкъарда бёлюмюнде былтыр чеклени реестрин жарашдырыу иш къалай бардырылгъаныны эсеплерин чыгъаргъандыла.

«Чеклени реестри» деген сёз 2017 жылда чыкъгъанды. Ол ЕГРН-ни бир кесегиди, анда эллени, шахарланы, районланы, сора дагъыда маданият, табийгъатны къоруулау эмда жамауатха бла къыралгъа башха жанлары бла магъаналы болгъан тийрелени чеклерини юсюнден информация жыйылады. 2021 жылда бу реестрни къыралыбызны социал-экономика айнытыу стратегиялы башламчылыгъына (НСПД) къошхандыла.

Алай бла,  реестр ма быллай тийрелени юслеринден информациядан къуралады: энчи хайырланыуда болгъан, маданият байлыкъгъа саналгъан, социал-экономика жаны бла эм тири айный баргъан, энчи къорууланнган табийгъат тийреледен, энчи экономика тийреледен, уучулукъ жерледен, Байкалны тёгерегинде жерледен эм башхаладан.

Роскадастрны КъМР-де бёлюмюню башчысы Анна Тонконог айтханнга кёре, адамла, инвесторла, власть органла, жерни эмда аны чеклерини юсюнден реестрде толу информация болса хайырланаллыкъдыла аны.

ЕГРН-ни чеклени юсюнден информация бла толтуруу ишни къыралны Башчысы контрольда тутады. Хар регион да кесини план-графигин жарашдыргъанды. Муниципалитетлени, эллени, башха тюрлю тийрелени чеклерин тохташдырыу иш да анга кёре барады. Къабарты-Малкъарда былтыргъы борчланы бары да тамам этилгендиле. Алай бла шёндю ЕГРН-де 112 муниципал къуралыуну, 85 элни эмда 611 тийрени юслеринден информация барды. Быйыл да иш андан ары барлыкъды, ол толусунлай 2027 жылны биринчи январына тамам этилирге керекди.

Улбашланы Мурат.