Адыгэ Республикэм къыщыдэкI «Адыгэ макъ» газетыр дунейм къытехьэн зэрыщIидзэрэ илъэси 100 зэрырикъур 2023 гъэм игъэлъэпIащ. Абы теухуауэ ирагъэкIуэкIа гуфIэгъуэ зэхыхьэхэм я кIэух зэIущIэт дыгъэгъазэм и иужьрей махуэхэм къызэрагъэпэщар.
КъуэкIыпIэм щыпсэу лъэпкъхэм я гъуазджэмкIэ къэрал музейм и къудамэу Мейкъуапэ дэтым щекIуэкIащ пшыхь дахэр. Къэрал IуэхущIапIэхэм, жылагъуэ зэгухьэныгъэхэм, хъыбарегъащIэ IэнатIэхэм я лIыкIуэхэр, щIэджыкIакIуэхэр, творческэ гупхэр щызэхуэса Iуэхур къызэригъэпэщащ икIи иригъэкIуэкIащ «Адыгэ макъ» газетым и редактор нэхъыщхьэм и къуэдзэ, УФ-м щIыхь зиIэ и журналист Тау Замирэ. Адыгэ Республикэм и Iэтащхьэ КъумпIыл Мурат редакцэм къыхуигъэхьа фIэхъус тхылъым псом япэу къеджащ Замирэ.
«Адыгэ макъым» цIыху зэчиифIэ куэд щолажьэ. Газетыр лъэпкъ щIэныгъэм, адыгэ щэнхабзэм увыпIэшхуэ щызыубыд къыдэкIыгъуэу сыт щыгъуи щытащ иджыри апхуэдэу къокIуэкI. Абы лъэпкъым дежкIэ мыхьэнэшхуэ иIэщ жыпIэмэ, ущыуэнукъым. ДяпэкIи, и гуащIэм хэмыщIу, нэхъри зиужь зэпыту екIуэкIыну си гуапэщ», - щыжеIэ КъумпIылым и хъуэхъум.
Абы и псалъэхэр диIыгъыу къэпсэлъащ АР-м Лъэпкъ IуэхухэмкIэ, хамэ къэралхэм щыпсэу ди лъэпкъэгъухэм запыщIэнымрэ хъыбарегъащIэ IэнатIэхэмкIэ и комитетым и тхьэмадэ Щхьэлахъуэ Аскэр. ЛIэщIыгъуэ псо зи ныбжь газетым и хъыбар кIэщIу къэпIуэтыфын хуэдэу зэрыщымытыр, нобэ щылажьэхэми, нэхъапэм Iуэху щызыщIахэми фIыщIэ ин зэрахуищIыр къыхэщу къэпсэлъащ Щхьэлахъуэр. Абы къыхигъэщащ «Адыгэ макъым» и етIуанэ лIэщIыгъуэм зыужьыныгъэрэ ехъулIэныгъэу куэд къехъулIэну зэригуапэр, апхуэдэуи комитетым къыбгъэдэкI фIыщIэ тхылъхэр яритащ ХъутIыжь Нусетэ, Ацумыжъ Хьэлым, Ныбэ Анзор, Ансыкъуэ Иринэ сымэ.
ТхылъымпIэм тедзауэ къыдэкIа газетым нэмыщIу, махуэ къэс интернетым адыгэбзэкIи, урысыбзэкIи, тыркубзэкIи хъыбарыщIэхэр кърелъхьэ «Адыгэ макъым». Здынэса ныбжьым къаруущIэ къыхилъхьауэ, зэманым декIуу мэлажьэ.
- «Адыгэ макъыр» адыгэ макъ зыщIыр мыбы щылажьэхэм я закъуэкъым. Абы и щыIэныгъэр зи фIыщIэр нобэ ди зэIущIэм кърихьэлIахэрщ, республикэм щыпсэухэрщ, Iэ щIэзыдзхэрщ. Дэ ди лэжьыгъэр цIыхухэрщ зыхуэгъэзар. Абы къыхэкIыу, зэманым и ужь зыкъидгъанэркъым, щIэуэ къежьэ псори ди щIэджыкIакIуэхэм къахуэсэбэпын хуэдэу ди Iуэхум зэрыхэтпщэным иужь дитщ, - жиIащ «Адыгэ макъ» газетым и редактор нэхъыщхьэ МэшлIокъуэ Саидэ.
ВидеозэпыщIэныгъэ Iэмалхэр къагъэсэбэпу къызэхуэсахэм хъуэхъу псалъэкIэ зыхуагъэзащ КъБР-м и Журналистхэм я зэгухьэныгъэм и тхьэмадэ, «Адыгэ псалъэ» газетым и редактор нэхъыщхьэ Жыласэ Заурбэч, КъШР-м щытрадзэ «Черкес хэку» газетым и редактор нэхъыщхьэ Абидокъуэ Люсанэ, Абхъаз Республикэм и лъэпкъ газет «Апсны»-м и редактор нэхъыщхьэ Анкваб Ахрэ сымэ.
Илъэсым и кIэм, махуэшхуэр къыщыблагъэм, «Адыгэ макъым» зэпеуэ иригъэкIуэкIауэ щытащ, «Хэт и псей нэхъ дахэ» жиIэу. ИлъэсыщIэ жыгхэр зыгъэувахэм редакцэм сурэт кърагъэхьри, нэхъ дахэу къалъытар къыхахащ. ТекIуэныгъэ къэзыхьа Делэкъуэ Динарэрэ Шагъундокъуэ Даринэрэ кърагъэблэгъащ зэхыхьэм. Абыхэм тыгъэ хуащIащ бзылъхугъэ IэпэIэсэ Бэджокъуэ Бэлэ и IэрыкI адыгэ ныпыр.
Редакцэр зи ужь итыр газетыр тедзэн къудейкъым. АтIэ жылагъуэ гъащIэми жыджэру хэтщ. АР-м щылажьэ Адыгэ Хасэм и гъусэу блэкIа илъэсым хьэщIэщ зэIущIэхэр зэхашащ, апхэдэуи жану долажьэ АР-м и Бзылъхугъэхэм я зэгухьэныгъэм. Адыгэ Хасэм и тхьэмадэ ЛIымыщэкъуэ Рэмэзанрэ Бзылъхугъэхэм я зэгухьэныгъэм и гуащэ Вэрокъуэ Хьэлимэтрэ гуапэу ехъуэхъуащ лъэпкъ газетым и редакцэм.
Апхуэдэу гуапэу «Адыгэ макъым» къыхуэкIуат Адыгей телевиденэм и лэжьакIуэхэри. Газетым и цIэр зытет футболкэхэр зыщыгъ журналистхэр чэзууэ къеджащ абы и махуэшхуэм теухуауэ Адыгэ Республикэм щIыхь зиIэ и журналист ТIэш Светланэ итха усэм. КъыжыIапхъэщ Адыгэ телерадиокомпаниемрэ «Адыгэ макъымрэ» быдэу зэрызэпыщIар, зэрызэдэлажьэр. Редакцэм щылажьэхэм я Iуэху телевиденэм щыдагъэкIыу, тележурналистхэми тхыгъэ гъэщIэгъуэнхэр редакцэм къыхуахьу апхуэдэщ. Уеблэмэ я лэжьакIуэхэмкIэ щызэхъуажэр куэдрэщ.
Пшыхьым кърихьэлIат республикэ гимназием и егъэджакIуэхэри. Абыхэм нэрылъагъу къащIащ «Адыгэ макъым» зэреджэр. Газетым пщэрылъу зыхуигъэувыжхэм ящыщщ дяпэкIэ абы щылэжьэнухэр къыхэхыныр, гъэхьэзырыныр. Мис абы и лъэныкъуэкIэ журналистхэр еджапIэхэм япыщIащ. Республикэм и районхэм зэIущIэхэр щрегъэкIуэкI, «Адыгэ макъым» Iуэху щызыщIэхэр ныбжьыщIэхэм йопсалъэ. АдыгэбзэмкIэ тхэ къахэкIмэ, я гуапэу дэлэжьэнущ, дэIэпыкъунущ, трагъэгушхуэнущ икIи школым зэрыщIэсым хуэдэу яхуэтхэ зэрыхъунур гурагъаIуэ.
Пшыхьыр ягъэдэхащ «Ошад», «Синдикэ» къэфакIуэ гупхэм, Хъуран Азэ, Нэгъуей Заур сымэ уэрэд жаIащ. Хъуран Iэзэ «Адыгэ макъым» и дамыгъэр дыщэ IуданэкIэ щыхэдыкIа илъэсыщIэ шарыр редакцэм тыгъэ хуищIащ.
КъуэкIыпIэм щыпсэу лъэпкъхэм я гъуазджэмкIэ къэрал музейм и къудамэу Мейкъуапэ дэтым и унафэщI ЩауэпцIэкъуэ Iэминат «Адыгэ макъыр» илъэсищэ зэрырикъуам теухуа зэхуэсхэр дахэу къызэрызэщIакъуэжар жиIащ икIи лъэпкъым дежкIэ мыхьэнэ ин зиIэ газетыр лъэ быдэ тету етIуанэ лIэщIыгъуэм зэрыхыхьэр къыхигъэщащ.
Газетым щылажьэ пщащэхэм Бэджокъуэ Белэ ида фащэхэр ящыгъыу утыкум къихьэри, пшыхьыр удж дахэкIэ зэхуащIыжащ.
НэщIэпыджэ Замирэ.