Шимал-Кавказстатдан билдиргенлерича, Къабарты-Малкъарда биринчи кварталда урлукълукъну хазырлап башлайдыла. Быйыл да ол тёре бузулмагъанды. Ишчи кюнле башланнганлай  Беларусь Республикагъа нартюхден  фитосанитар сертификацияны ётген  125 тонна урлукъ ашырылгъанды.  Бюгюнлюкде да  бу жаны бла иш къыстау барады.

Эсге сала айтсакъ,  жыл сайын Къабарты-Малкъарда  нартюхню гибрид тюрлюсюнден 15 минг тонна чакълы жарашдырылады. Аланы арасында эртте эм кеч чакъгъанла да бардыла. Ол толусунлай эл мюлклени эм миллет стандартны излемлерине келишеди  эм къоркъуусузду.
 

Республикагъа  нартюх урлукъдан 3,5 минг тонна керек болады. Ол себепден регион кесин аны бла тынгылы жалчытханлы иги кесек заман болады. Аны себепли арт жыллада республика артыгъын бирси субъектлеге эм къыраллагъа да  жибереди.

Анга кёре былтыр  сагъынылгъан продукциядан 24,3 миллион доллар багъасына сатылгъанды.  Ол планда белгиленнген кёрюмдюден 10,9 миллион долларгъа артыкъ окъунады. 

Бизни корр.