Тэтэрстан Республикэм и вице-премьер Шайхразиев Василий зи пашэ къулыкъущIэ гуп лэжьыгъэ IуэхукIэ Къэ­бэрдей-Балъкъэр Республикэм къэкIуащ. КъБР-м и Iэтащхьэ КIуэкIуэ Казбек хуэзащ лIыкIуэхэм я пашэм икIи ди щIыналъэхэр зэрызэдэлэ­жьэнум тепсэлъыхьащ. 

«Къэбэрдей-Балъкъэрымрэ Тэтэрстанымрэ куэд щIауэ зэпыщIащ ныбжьэгъугъэ, щэнхабзэ, сату-экономикэ унэтIы­ны­гъэхэмкIэ. Тэтэрстан Республикэм и Iэтащхьэ Минниханов Рустам къэрал, политикэ лэжьакIуэ ахъырзэманхэм ящыщ зыщ, дэ абы сыт щыгъуи дыпыщIауэ дыдолажьэ федеральнэ Iуэхухэр зэгъусэу зэфIыдох. 
Къапщтэмэ, иджырей Тэтэрстаныр Урысей Федерацэм и хэгъэгухэм ящыщу жыджэру зызыужьхэм хабжэ, дэри зэгъу­сэу дызэлэжьын куэд зи зэхуаку дэлъщ. Егъэджэныгъэ, узыншагъэр хъумэн, спорт, туризм, мэкъумэш IэнатIэхэмкIэ ды­зэдэIэпыкъуным лъэныкъуитIми ди фейдэ къыпэкIуэнущ. 
А псом къищынэмыщIауэ, Къэбэрдей-Балъкъэр Респуб­ликэм тэтэру минрэ ныкъуэм щIигъу щопсэу, щэнхабзэ центр щолажьэ. Тэтэр лъэпкъым и хабзэр, щэнхабзэр хъумэным ехьэлIа зэIущIэхэр къызэригъэ­пэщу, адрей лъэпкъ зэгухьэныгъэхэми къэрал IуэхущIапIэхэми ядэлажьэу апхуэдэщ центрыр», - щетх КIуэкIуэ Казбек и телеграм-каналым. 
УнафэщIхэм я зэIущIэр иуха нэужь, республикэ Iэтащхьэм къулыкъущIапIэхэм къалэн ящи­щIащ дызыхуэкIуэ илъэс­хэм Къэбэрдей-Балъкъэрымрэ Тэтэрстанымрэ зэрызэдэлэ­жьэну программэр яубзыхуну.