«Урысейм щащIащ» фес­тиваль-жармыкIэр Китайм и илъэсыщIэ махуэшхуэхэм, щIышылэм и 27-м щегъэ­жьауэ мазаем и 5 пщIондэ,  а къэралым щекIуэкIынущ. Ляонин къалэм къыщызэрегъэпэщ жармыкIэм нэхъы­бэу щагъэлъэгъуэнур ди къэралым щащIа ерыскъыхэкIхэмрэ шхыныгъуэ зэ­мылIэужьыгъуэхэмрэщ. 

Урысей экспорт центрым, Урысей экспортерхэм защIэгъэкъуэнымкIэ къэрал инс­титутым, Урысейм и Прави­тельствэмрэ Ляонин хэгъэ­-гум и ЦIыхубэ Правительст­вэмрэ я щIэгъэкъуэну иджы япэу къызэрагъэпэщ Iуэхум Урысей Федерацэм щыщу IуэхущIапIэ 70-м щIигъу хэтынущ, хьэпшып, шхыныгъуэ лIэужьыгъуэу 1400-рэ утыку кърахьэнущ. А тхьэмахуэм къриубыдэу цIыху мелуни 3-м щIигъу жармыкIэм къекIуэ­лIэну хуагъэфащэ къызэгъэ­пэщакIуэхэм. 
Урысейм и мэкъумэш IэнатIэм лъэ быдэкIэ нэхъ щыува компаниехэрщ псом япэу гъэ­лъэгъуэныгъэм ирагъэблэ­гъар. Ахэр: «Мираторг», «Черкизово», «Эфко», «Балтика», «МАКФА», «Союзпищепром», «Объединенные кондитеры», «Славянка», «Русский краб», «СЗРК», «Эконива», «Комос», «БРПИ», «Дядя Ваня», «АБИ Продакт», нэгъуэщIхэри.
Китайхэм я илъэсыщIэ Iэ­нэм трагъэувэну, жармы­кIэм къыщащэху хъунущ фо, морожнэ, кIэнфет, вафлъэ, ­нэгъуэщI IэфIыкIэ зэмы-лIэужьыгъуэхэр, нартыхум ­къы­хэщIыкIа IэфIхэр, квас, пе­ченье, мэрзей, торт, нэ­гъуэщIхэри. Урысейм ищэр Китайм и электроннэ IэмалхэмкIэ къэпщэхъу хъун хуэ­-дэу зэтраублащ. «Урысейм щащIащ» брендым щIэту дя­пэкIэ а къэралым и лъэпкъ тыкуэнхэм щащэнур мин зыбжанэм щIигъуащ. 
- «Урысейм щащIащ» фес­тиваль-жармыкIэр Урысеймрэ Китаймрэ я экономикэ зэпыщIэныгъэм нэхъри зе­зыгъэужьыну лъэбакъуэщ. Ди компание лъэрызехьэхэм къыщIагъэкIхэмрэ ящIхэмрэ китайхэм ирагъэлъагъуну, ­зэгурыIуэныгъэхэр дащIыну ­Iэмал яIэнущ, апхуэдэуи дунейпсо утыкум Урысейм и пщIэр щигъэбыдэнымкIэ ­IэмалыфIщ кърахьэжьа Iуэхур, - жиIащ Урысей экспорт цент­рым и генеральнэ унафэщI Никишинэ Веро­никэ. 
Псом нэхърэ нэхъыщхьэр компаниехэм ягъэпэжын зэ­ры­хуейрщ зи жьауэ щIэт брендыр - «Урысейм щащIащ». 
Фестиваль-жармыкIэм сабийхэми, балигъхэми папщIэ мастер-классхэр щагъэлъэгъуэнущ. Абы къищынэ­мы­щIауэ, урысей къэфакIуэхэм, уэрэджыIакIуэхэм зыкъыщагъэлъагъуэ утыку щыIэнущ, урыс хабзэр, шыфэлIыфэр, хьэлыр, теплъэр зыхэплъа­гъуэ хьэпшыпхэмкIэ гъэщIэ­рэщIа сурэт зытрегъэхыпIэ яузэдынущ. 
Урысей экспорт центрым компание псоми мылъкукIи нэгъуэщI IуэхухэмкIи защIегъакъуэ хамэ къэрал рынокхэм хыхьэн папщIэ, абы хэтщ «Дунейпсо кооперацэм­рэ экспортымрэ» лъэпкъ проектри.
IэщIагъэлIхэм зэрыжаIэмкIэ, Экспортыр дэIыгъынымкIэ лъэпкъ проектыр 2030 гъэ пщIондэ ягъэкIуэтэнущ. 
Дыщыгугъынщ абы и фIыгъэкIэ Урысей Федерацэм и хэгъэгухэр зэгухьэурэ фе­деральнэ щIыналъэхэм къы­щыщIагъэкI, щащI, щагъэкIхэр зыщIагъэувэ бренд­хэр дяпэкIэ къэрал кIуэцI, къэрал щIыб сатум лъэ бы­дэкIэ щыувыну. Фигу къэдгъэкIыжынщи, дэри диIэщ «Кавказым щащIащ» урысей маркэр. Ар Кавказ Ищхъэрэм и ерыскъыхэмрэ хьэпшы­пэм­рэ я фIагъым и дамыгъэщ икIи ди щIыналъэм щыла­-жьэ хьэрычэтыщIэхэм я дежкIэ сэбэпышхуэщ. 
Урысейм иIэщ «Удмуртием щащIащ», «Юграм щащIащ», «Алтайм щащIащ», «Кавка­зым щащIащ» маркэхэр. А хьэп­шыпхэм е ерыскъыхэм я сертификатыр «Рос­качест­во»-м къариту аращ икIи ар фIагъым и шэсыпIэ нэс ­хъуащ. 
«Кавказыр игъащIэ лъандэрэ и ерыскъыхэмкIэ, и хьэщIэ егъэблэгъэкIэмрэ гъэ­хьэщIэкIэмкIэ цIэрыIуэщ. Иджыпстуи шхыныгъуэфI­-хэр, псы зэмылIэужьыгъуэхэр къы­щыщIагъэкI. А псори экологие и лъэныкъуэкIэ зыхуэ­-дэ щымыIэу къабзэщ. Ди ­гуапэу Урысей псом я пащхьэ итлъхьэнущ фIагъ лъагэ зиIэ ерыскъыхэкIхэр, апхуэдэ щIы­кIэкIэ, ди хьэрычэты­щIэхэм дадэIэпыкъунущ», - жеIэ «Кавказ.РФ»-м и генеральнэ унафэщI Юмшанов Андрей.
Кавказым къыщыщIагъэкI­хэр псори ерыскъы хьэлэлщ икIи «щхъуантIэщ» - экологие и лъэныкъуэкIэ къабзэщ. Кавказ Ищхъэрэ федеральнэ щIыналъэм апхуэдэ ерыскъыхэкI къыщIэзыгъэкI, мы маркэр къэзыщта IуэхущIапIитху итщ, щыр - Ставро­поль, тIур Къэбэрдей-Балъкъэрым щолажьэ. Ахэр махуэ къэс нэхъыбэ мэхъу. Абыхэм я нэхъыбэр ерыскъы къы­щIэзыгъэкIхэращ, ауэ узыншагъэр хъумэн IэнатIэм епхахэри яхэтщ. 
«Кавказым щащIащ» дамыгъэр зытетыр нэхъыфIу ящэнымкIэ «Роскачество»-р дэIэпыкъуэгъу мэхъу. Абы нэмыщIу, а дамыгъэр зыIэ­рагъэхьэну хуейуэ зи дэфтэр зытахэм я хьэрычэт Iуэхур ­нэхъыфI, тынш хъунущ, къэп­щытэныгъэ лей хэмыту ягъэ­лэжьэнущ, апхуэдэуи Урысей Федерацэм и Правитель­ст­вэм и Саугъэтыр зыIэрагъэ­хьэнымкIэ зэпеуэм хэтыну ­Iэмал яIэщ, жыпIэнурамэ, Iуэху­щIапIэм лэжьэкIэм зезыгъэужьыну щыIэ псори къы­хуогъэсэбэп.
Апхуэдэ дамыгъэ зиIэ хьэ­рычэтыщIэм дзыхь хуэпщI ­хъунущ, апхуэдэуи гугъуехь хэмыту Урысейм и къалэш­хуэхэм дэт сату щIыпIэ нэхъ инхэм я IэрыкIыр щащэну Iэмал къарет, дунейпсо утыку­хэм йохьэ.
Псоми зэращIэщи, Кавказ Ищхъэрэм ис лъэпкъхэр зэ­ры­цIэрыIуэ IэщIагъэ зырыз яIэщ, ижь-ижьыж лъандэрэ лъэпкъым къыдекIуэкIыу. Мис апхуэдэ IэпщIэлъапщIэ­хэм я IэдакъэщIэкIхэри хабзэм къызэригъэувым тету яхуэ­щэнущ, зыри пэрыуэгъу къахуэмыхъуу. 
НэщIэпыджэ  Замирэ.