КъМР-ни Промышленность, энергетика эмда сатыу-алыу министерствосуну энергетиканы айнытыу эмда аны къыйматлылыгъын кючлендириу бёлюмю регионда отлукъ-энергетика комплексни ишине кёз-къулакъ болады. Былтыр ол да къатышып, сейирлери болгъан структурала бла бирге ма быллай мадарла этилгендиле:

- Къабарты-Малкъарны 2023-2024 жыллада газ бла жалчытыу программасы къабыл этилгенди. Аны бла «Газпром газораспределение Нальчик» компания кюреширикди. Аны кезиуюнде тамамланырыкъ жумушланы багъасы кёк отлукъну жиберген тарифде энчи къошакъдан алынырыкъды;

- гражданланы талай къауумларына газ оборудованияны сатып алыргъа эмда арбазларында бла юйлеринде тийишли ишлени тамамларгъа субсидияла бла себеплик этиу низам тохташдырылгъанды.

Саулай айтханда, озгъан жылны ахырына Къабарты-Малкъарда социал газификация деген программагъа къатышыргъа сюйгенледен 2699 заявка берилгенди. Ол санда 2478 инсанны жумушларын тамам этгендиле, 1154 юйню уа газ бла жалчытып башлагъандыла.

Бу программаны чеклеринде дагъыда инсанланы талай категорияларына газ оборудование эмда материалла сатып алыргъа, ишлени багъасын тёлерге себеплик этилгенди.

Инвестициялы проектлени тамамлауну чеклеринде, бёлюм «Черекская МГЭС» эмда «Верхнебаксанская МГЭС на р. Адыр-су» объектлени къурулушлары бла байламлы жумушлагъа кёз-къулакъ болуп тургъанды. Экинчисинде шёндю проект-тинтиу, биринчисинде уа къурулуш-монтаж ишле бардырыладыла.

Министерствогъа келген обращениялагъа энчи эс бурулады. Гражданланы социал сетьледе, ведомствону интернет-сайтында жазгъанларына да жууап бериледи, деп чертгендиле анда.

Улбашланы Мурат.