Кёп болмай КъМКъУ-ну Элбрусда окъуу-илму комплексинде «Билим бериуню эсеплери: башланнган класслада окъугъанлагъа багъа бичиу амалланы игилендириу» деген аты бла Битеуроссей форум болгъанды. Аны вузну педагогика, психология эм физкультура-спорт институту къурагъанды. Анга Красноярск, Нижний Новгород, Дондагъы Ростов, Москва шахарладан эмда Чечен Республикадан устазла, вузланы преподавательлери, басма организацияланы методистлери, профессорла эм башхала къатышхандыла.
Тюбешиуде къырал инновация жаны бла айный баргъанда, школгъа да анга келишген устаз керек болгъанын белгилегендиле. Ол, профессионал билиминден сора да, чыгъармачылыкъ жаны бла фахмулу, бюгюннгю технологияла бла ишлеген, билим бериуде жангы амалланы хайырланнган адам болургъа кереклиси айтылгъанды.
Жыйылыуда КъМКъУ-ну педагогика кафедрасыны бла колледжини устазлары бусагъатда школлада билим бериу системаны эм окъуучуланы юйретиуню жангы амалларын сюзгендиле. Аслам эс башланнган класслада программаланы жетишимли бардырыу ишге бурулгъанды. Аладан бири - окъургъа юйретиудю. Сабийге энчи кёзден къарай билген, аны хунерин ачыкълагъан, анга да багъа биче билген уллу магъананы тутады. Ол жаны бла жангы амалла бла шагъырейленнгендиле педагогла.
Андан сора да, республикада «Российский учебник» китап басманы бёлюмлерин ачар амалгъа къаралгъанды. Аны тамата методисти Елена Судьнина «Школгъа дери кезиу» эм «21-чи ёмюрню школу» деген проектле бла шагъырей этгенди. Красноярскдан бла Нижний Новгороддан келген устазланы къаууму уа коллегаларына окъуучула бла жетишимли ишлей билирча мастер-классла ётдюргендиле. Форумну ахырында анга къатышханла мындан арысында аны жыл сайын бардыра турургъа келишгендиле.
