16 январьда «Единая Россия» Россейни Президентине айырыулада Владимир Путин жанлы къол ызланы жыйыуну бирикдирилген кюнюн бардырлыкъды. Бу жумушла къыралны битеу регионларында да боллукъдула,  ол санда партияны башчысыны жамауат приёмныйлеринде, регион эм жер-жерли толтуруу комитетледе да.

 - Бу жумушлагъа къатышыргъа онглары болмагъан, узакъда орналгъан регионлада уа адамлагъа волонтёрла болушурукъдула,- деп жазгъанды телеграм-каналында партияны генеральный советини секретары Андрей Турчак.

Ол айтханыча, къол ызланы жыйыу бла бирге партияны халкъ программасыны эсеплери сюзюллюкдюле, келир кезиуге борчла салынырыкъдыла.

Андрей Турчак айтханыча, Владимир Путинни Президентни айырыулагъа кёргюзтюуге къол ызланы жыйыугъа битеу регионла да къатышадыла. Бу ишни 19 мингден аслам волонтёр бардырады.

«Единая Россия» ХХI съездде 2024 жылда РФ-ни Президентин айырыугъа Владимир Путин къатышыр  жанлы бирча къол кётюргенлерин айтырчады. Анда  партияны башчысы Дмитрий Медведев къыралны оноучусу айырыулада жангыдан хорларча къолдан келген этиллигин  айтхан эди.

 2023 жылда декабрьде Владимир Путинни кандидатурасына себеплик этген къауум къуралгъанды. Аны биринчи жыйылыуу 9 декабрьде бардырылгъанды. Анга жамауат къуллукъчула, алимле, спортчула, аскерчиле, волонтёрла, политикле, промышленностьда уруннганла киргендиле. «Единая Россиядан» анга Генсоветни секретары Андрей Турчак, партияны Къырал Думада фракциясыны башчысы Владимир Васильев, ара толтуруу комитетини таматасы   Александр Сидякин, партияны жаш гвардиячыларыны башчысы  Антон Демидов,  депутатла, сенаторла киргендиле.

Тикаланы Фатима хазырлагъанды.