Къышда суулада адамла ачымаз эмда, ажымлы болмаз ючюн  МЧС алада халны дайым  эсепде тутады. Бу жол къутхарыучула Нальчикде экинчи кёлде болгъандыла. Алыкъа ол суудан бош этилмегенди, аз-маз бузлай башлагъанды. Бузгъа чыгъаргъа жарамагъаныны юсюнден жагъада белгиле салыннгандыла, солугъанлагъа ангылатыула этилгендиле.

Суулада адамланы къоркъуусузлукъларын сакълау жаны бла бёлюмден  эсгертгенлерича, бизни регионда буз асламысында жукъады, адамны кётюрлюк тюйюлдю. Къоркъуусузгъа къалынлыгъы 10 сантиметр болгъан буз саналады, жаяу ётерге 15 сантиметрлик, учаргъа уа 25 сантиметрлик бузда жарайды. Ол кёк неда жашил тюрсюнлю эсе, къатыды, алай акъ неда саргъылдым эсе, иничгеди, басхандан сора, таууш этдирмей, ууалып кетеди. «Бютюнда сабийле ючюн сакъ болугъуз. Гитчеле абадан кёргенни къайтарып этедиле, алагъа тюз юлгю кёргюзтюгюз», - дейди ол.

Къыйын болумгъа тюшгенле уа болушлукъну мобильный телефондан «112» номерге сёлешип чакъыраллыкъдыла.

Кульчаланы Зульфия.