Къашхатаучу Тюменланы Талибни жашы Мухарбий татыулу ётмеклери, чемерлиги, халаллыгъы бла да айтылып тургъанды. Кеси заманында Мухарбий Прохладный шахарда аш хазырлау жаны бла усталыкъгъа окъугъанды. Ишлеб а 70-чи жыллада Этезланы Копай башчылыкъ этген пекарняда башлагъан эди. «Улбашланы Хамза бла бирге ишлегенбиз. Мокъаланы Борис бла Къадырланы  Магомет а бизге болушуп тургъандыла. Ётмекни къол бла ишленнген печьде биширгенбиз. Аны орунун да кесибиз жарашдыргъан эдик. Бир кереге тылыны  250 килограммын жарашдырып тургъанбыз. Гыржынны бир сагъатны ичинде керекли температурагъа салып, алай тутханбыз. Андан сора саналгъанды ол иги бишгеннге», – деп эсгериучю эди уста. 
Ол айтханнга кёре, ётмек бишириуню жаланда ала билген амалы да болгъанды. Ала кеслери жарашдыргъан ачытхыны хайырланнгандыла. Ариу бишген, татыулу ётмекни жаланда къашхатаучула угъай, жууукъ элледен да келип алгъандыла. Элни акъсакъаллары айтханнга кёре, бери  ол заманда Гюржюден окъуна келип тургъандыла.  
Насыпха, бюгюнлюкде да бардыла ётмекни татыулу да, тынгылы да биширгенле. Хасаниячы Геляланы Рустам аны киши билмеген амал  бла жарашдыргъаннга ушайды. Тюкенде аны ётмеклерине эс бурмай къоймайса: ала  къагъыт хуржунну ичиндедиле. Аладан бирин къолума алып, керти окъуна ётмек ийис этгенин жаратама. «Багъасы башхаладан уллу болгъанына да къарамай, адамла аны сюйюп аладыла, анга сурам барды. Кёресиз, башха ётмекле да бардыла, алай  алыучуларыбыз Геля улуну ётмеклерин кёрмеселе, бурулуп кетедиле», –дейди тюкенчи.
Геляланы Рустамны энчи амалы да болур, алай аны  жашырынлыгъы жаланда тутхан ишине саулай жюреги бла берилгенинде сунама.  

Люба Адилова.