КъМР-де МВД-ны коллегиясыны жыйылыуунда министерствону ишини эсеплери чыгъарылгъандыла. Анга КъМР-де баш федерал инспектор Евгений Ткачёв, Экономика эм жамауат къоркъуусузлукъну советини секретары Казбек Татуев, прокурорну орунбасары Игорь Дармилов, районлада бёлюмлени башчылары, Жамауат советни келечилери да къатышхандыла, деп билдиргендиле бизге ведомствону пресс-службасындан.
Жыйылыуну ача, ич ишлени министри Игорь Ромашкин жылны биринчи жарымында законлукъну эм право низамны кючлеу, инсанланы эркинликлерин эм ырысхыларын сакълау жаны бла мадарла андан ары бардырылгъанларын чертгенди.
- Власть, сейирлери болгъан башха органла бла бирге тамамланнган ишни хайырындан республикада оператив хал контрольда болгъанды, тюрлениуле эсленнгенлей, терк окъуна тийишли жумушла толтурулгъандыла, - дегенди Ромашкин. Аны билдиргенине кёре, жылны аллындан бери талауур, билип адамны саулугъуна заран салыу, уручулукъ дегенча аманлыкъла азайгъандыла.
Коллегияда районлада ич ишле органланы бёлюмлерини башчылары сёлешгендиле. Ала министерствону ишин къурау жаны бла эсгертиуле да этгендиле. Сёз полициячыланы билимлерин ёсдюрюуню юсюнден да баргъанды. Экономика къоркъуусузлукъ эм коррупциягъа эмда наркотиклеге къажау управленияланы башчылары, Жолда жюрюуню къоркъуусузлугъу жаны бла бёлюмню, Экстремизмге къажау араны ишлерини эсеплери да сюзюлгендиле. Докладчыла оператив къуллукъ этиуде чырмауланы, кемчиликлени да белгили этгендиле.
Ахырында келир кезиуге борчла салыннгандыла, Игорь Ромашкин аланы толтуруугъа жууаплыланы белгилегенди. Кенгеш къуллукъ этиуде айырмалылагъа ведомстволу саугъала бериу бла бошалгъанды.