Россей Федерацияны Президенти Владимир Путинни оноуу бла Росмолодёжьну «Жаш адамлагъа регион» деген проектлерини чеклеринде Къабарты-Малкъар Республикада кёп жумушла тамамлагъан жаш тёлю арала ишленедиле. Алгъаракълада аллай арала Къашхатауда бла Нартанда ачылып, жумушларын жетишимли бардырадыла.
Кёп болмай а Нальчикде араны ачылыуу да болгъанды. Ол алгъыннгы Профсоюзланы маданият юйюню ючюнчю къатында орналгъанды, мекямда жангыртыу ишле этилгендиле, жаш адамланы айныуларына керекли оборудование бла техника салгъандыла. Аны ачылыууна келген къонакълагъа презентацияла кёргюзтгендиле.
Ара жети тюрлю бёлюмден къуралгъанды: солуу, оюн, конференц залла, чыгъармачылыкъ мастерскойла, медиа-арала да бардыла. Дагъыда экинчи этажында Биринчилени Къымылдауларыны регион арасы, КъМР-ни Жаш тёлюню ишлери жаны министерствосу, «Эльбрус» корпоратив университет бла Волонтёрланы айнытхан ресурс ара ишлейдиле.
Быйылдан башлап аны биринчи этажында арт-резиденция ишин башларыкъды. Анда республикада эм уллу концерт зал да ачыллыкъды. Анда жаш адамлагъа конференцияла, кёрмючле, лекцияла, форумла бардырыргъа умутлудула.
Жаш тёлюню ишлери жаны бла министр Азамат Люев быйыл Чегемде, Майскийде, Тырныауузда эм Анзорейде да аллай арала ачаргъа сюйгенлерин билдиргенди.
Темуккуланы Амина.
