Барыбыз да билгенликден, 2023 жыл къыралыбызны президенти Владимир Путинни оноуу бла «Устазны бла насийхатчыны жылы» деген белги бла озгъанды. Аны къууанчлы халда жабылыууна аталгъан ингирле республика, муниципал даражалада да къуралгъандыла.
Аллай байрам Жангы жылны аллында Черек районну Огъары Жемтала элини Чубокланы Алий атлы битеулю билим берген мектебинде да болгъанды. Аны къураугъа эмда бардырыугъа уа юлюшлерин школну мектепге дери билим берген бёлюмюнде ишлегенле къошхандыла.
Ингирни бардыргъан юйретиучюле Ностуланы Мадина (школгъа хазырланнган къауум) бла Мусукланы Марина (тамата къауум) жыйылгъанлагъа устазны, насийхатчыны да даражаларыны юслеринден айтхандыла. Жамауат педагоглагъа берген хурметни да энчилиги бола келгенин ангылатхандыла.
Устазланы, юйретиучюлени да школну директору Къудайланы Марат бла мектепни школгъа дери билим берген бёлюмюню таматасы Мамайланы Римма «Устазны бла насийхатчыны жылыны» къууанчлы халда жабылгъаны бла алгъышлагъандыла. Хар сабий – ол кеси аллына бир хунер болгъанын чертип, аланы фахмуларын айнытыугъа педагогла салгъан къыйынны да энчилегендиле. Ызы бла ала ишчилерин билим бериу махкемелени грамоталары бла саугъалагъандыла.
Жашчыкъла бла къызчыкъла уа юйретиучюлерин, устазланы, ата-аналаны, башхаланы да назмуну шатык окъугъанлары, жарыкъ жырлары, тепсеулери бла да къууандыргъандыла. Бизге Марат Абдулкеримович билдиргеннге кёре уа, алагъа элде башха жерде хунерлерин айнытырча кружоклагъа жюрюр онг да болмагъанды, тепсеулеге, жырлагъа да сабийлени юйретиучюле кеслери тюшюндюргендиле. Ол шарт а ала кеслерини усталыкъларына уллу кёллю болмагъанларын, аны бла бирге уа ёсюп келген тёлюге да хар нени магъанасын толусунлай ангылатыргъа талпыннганларын кёргюзтеди.
Назмула уа, жаланда орусча угъай, ёз тилибизде да эшитилгендиле. Сёз ючюн, жемталачы жаш Алтууланы Кямранны устазларына атап жазгъан назмусун Мусукланы Рамазан окъугъанды. Андан сора да, элни ёсюп келгенлери аладан юлгю алырча адамлары барлыкълары, ала бла ёхтемленнгенлерини юслеринден да айтылгъанды.
Ингирде сёлеше, алгъыш, ыспас сёзлени ата-ана комитетни башчысы Болатланы Лейля да айтханды. Ол аланы барысына да ыразылыгъын билдирип, жангы жетишимле, саулукъ-эсенлик тилегенди. Мектепни, сабий садны да коллективлери уа анга, хар заманда да болушлукъларын, себепликлерин аямагъан бирсилеге да ыспас этгендиле.
Юйретиучюле кеслерини башламчылыкълары бла быллай жыйылыуну къурагъанларына эмда бардыргъанларына барысы да ыразы болгъандыла. Сабийчикле уа ахырында «Пусть всегда будет солнце!» деген, адам улугъа мамырлыкъны кючю, магъанасы да къалай терен болгъанын кёпден бери ачыкълап келген жырны айтхандыла.
Мокъаланы Зухура.
