КъМР-ни Башчысы Казбек Коков Къашхатауну эм уллу жолларындан бири – Уянаев атлы орамны халы бла шагъырейленнгенди, аны
быйылгъы жылда тынгылы ремонт этерге мурат барды.
Республиканы оноучусу кесини телеграм-каналында белгилегенине кёре, бу объект жолланы жангыртыу жаны бла планнга Казбек Коков кеси берген буйрукъгъа тийишлиликде тюшгенди.
«Жолну узунлугъу 3,2 километр болады, ол сабий садлагъа, школлагъа, спорт мекямлагъа, эл эм район администрациягъа элтген магъаналы транспорт ызгъа саналады. Аны бла байламлы проектин эм тийишли къагъытларын жарашдырыргъа буйрукъ бергенме. Андан сора да, башда сагъынылгъан учреждениялагъа баргъан жерлени да тапландырыргъа кереклисин эсгертгенме.
Огъары Малкъаргъа элтген федерал жолну жангыртыргъа да муратыбыз барды. Ол жол битеу районда жашагъанлагъа да бек магъаналыды, нек дегенде мында туризм иги айнып барады. Бу трасса жолоучулукъ бла байламлы ишленнген мекямлагъа да элтеди, анда бизни адамларыбыз ишлейдиле, республикагъа келген къонакъла да солуйдула. Жол бютюн къоркъуусузлу боллукъду эм тапландырыллыкъды. Эсигизге салайым, бу объект республикада эм уллуладан бирине эмда техника жаны бла къурулуш ишле къыйын бардырыллыкъ жерге саналады. Дагъыда Огъары Малкъарда элни тапландырыу бла байламлы ишле бла да шагъырейленнгенме.
Андан сора Аушигерде болгъанма, мында федерал программа бла онбир километр узунлугъу болгъан Сатушир-Аушигер суу ыз хайырланыргъа берилгенди. Бу инфраструктура объект ары дери ишлеп тургъан Къашхатау-Аушигер суу ыз бла бирге эллилени суу бла жалчытыу къайгъыны иги да игилендирликди.
Сагъынылгъан программа бла Аушигерде жангы 300 олтурур жери болгъан маданият юй ишленнгенди. Ол бир кесекден ачыллыкъды», – деп айтылады билдириуде.