Къабарты-Малкъарны Промышленность, энергетика эм сатыу-алыу министерствосу республикада жарашдырыучу производствола бла байламлы онжети бёлюмге кёз-къулакъ болады. Ары къумач согъуу, къайишден, къагъытдан, резинадан, пластмассаладан абериле, дагъыда къурулуш материалла, электрон эмда электрокюч оборудование, автотранспорт эмда машинала чыгъарыучу, химия продукцияны эмда агъачдан аберилени жарашдырыучу предприятияла киредиле. Тергеулеге кёре, промышленностьну айныуун ачыкълагъан кёрюмдю (ИПП) 2023 жылгъа 103 процент боллукъду, деп билдиргендиле министерстводан. Ол кеси да буруннгу жыл бла тенглешдиргенде.
Сёз ючюн, къумач согъууда ол 128 процентди. Анда «Текстиль Индустрия» предприятияны къыйыны уллуду. Юс кийимле чыгъарыуда уа 105 процентге жетерге ушайды. Бу бёлюмде «ВоенТекстильПром», «Дарий», «БТК Групп», «Югтекстильторг» компанияла эм талай ууакъ предприятияла къармашадыла.
Агъачдан абериле жарашдырыуда (117%), минерал продукция чыгъарыуда (115%), автотранспорт средстволаны производствосунда (105%) да айнытыу игиди. Машиналагъа эмда оборудованиягъа ремонт этиу эмда аланы жерлерине орнатыу бёлюмде уа ол бютюнда аламатды – 220%. Мында «Севкаврентген-Д» бла «Шахарны электрокюч сетьлери» иги къармашханларын белгилерчады.
«МСП» Корпорация да къатышып, министерство бизни республикада промышленность предприятиялагъа тыш регионлада ишчи байламлыкъла къураргъа болушады. Аны хайырындан «Кровля Сервис», «Кабельный завод Кавказкабель ТМ», «Баксан-Автозапчасть», «Севкаврентген-Д», «Эрпак», «Сад Сервис» эмда Чегемде мияла завод былтыр къыйматлы келишимле этгендиле.
Улбашланы Мурат.
