Кюн сайын къоркъуусузлукъгъа энчи эс бёлгенлей турургъа чакъырады РФ-ни МЧС-ини КъМР-де Баш управлениясы. Къыш кезиуде уа ол бузлагъан кёлледе учуу бла байламлыды.

Чилле жууукълаша келгени себепли, сууукъла да къаршыдыла. Ол кезиуде кёлле, суула да бузлайдыла. Адамла уа ол кезиуде бузгъа чыгъаргъа сюедиле. Алай ол бек къоркъуулуду. Бузну къалынлыгъы 10 сантиметрден аз болмазгъа керекди.  Конькиледе учар ючюн а ол 25 сантиметрге жетерге керекди.

Бузну къатылыгъыны юсюнден аны тюрсюню айтады. Сёз ючюн, кёксюл-жашил бетли буз къаты болады, акълай къалгъан а андан эки кереге къарыусузду, деп билдиредиле специалистле.

Бузгъа жууукъ жерде сабийлеге бютюн сакъ болургъа керекди. Ала абаданладан кёргенлерин этерге ёч болуучуларын эсге ала, бузгъа чыгъып юлгю кёргюзтмегиз. Аны ала къайтарыргъа сюерикдиле. Дагъыда юсюн  къар басхан буз да къоркъуулуду.

Къабарты-Малкъарда буз артыкъ къалын болмаучусун эсге ала, РФ-ни МЧС-ини КъМР-де Баш управлениясы жорукълагъа уллу кёллю болмазгъа чакъырады.

Къасымланы Аминат.