КъМР-ни Башчысы Казбек Коков республиканы саулукъ сакълау министри Рустам Калибатов бла ишчи тюбешиу бардыргъанды. Тюбешиуню кезиуюнде саулукъ сакълауну биринчи звеносун жангыртыуну программасы къалай бардырылгъаны эм саулукъ сакълау учрежденияланы келир кезиуде ишлерин сюзгендиле. Аны юсюнден республиканы оноучусуну пресс-службасы билдиреди.

2023 жылда Нальчикни экинчи эм ючюнчю шахар поликлиникаларыны филиалларында, экинчи эм тёртюнчю поликлиника бёлюмледе, Республикалы сабий клиникалы кёп жумушланы тамамлагъан арада, Прохладныйде эм Бахсанда ара поликлиника бёлюмлерини эмда Терекде сабий поликлиника бёлюмюню жангыртыу ишле башланнгандыла. Сагъынылгъан мекямлада къурулуш ишле быйылгъы жылда бошаллыкъдыла эм хайырланыргъа берилликдиле. Кенжеде жангы амбулатория ишлене турады. Республиканы муниципал районларыны саулукъ сакълау учрежденияларына 19 жангы автомашина берилгенди эм диагнозну тохташдырыргъа себеплик этген 80 тюрлю-тюрлю оборудование алыннганды.

Башда сагъынылгъан саулукъ сакълауну биринчи звеносун жангыртыу программаны хайырындан республикада 23 мекямгъа тынгылы ремонт этилгенди, саудукъ сакълауда 6 объект ишленнгенди эм жангыртылыннганды, эки жюзден артыкъ тюрлю-тюрлю медицина оборудование мажарылгъанды, элледе болгъан амбулаториялагъа бла поликлиникалагъа алтмыш автомашина алыннганды.

2024 жылда саулукъ сакълауда хайырланыргъа жарагъан беш жангы мекямны ишлеп башларгъа мурат барды, он беш мекямда жангыртыу ишле башланырыкъдыла, ол санда онусунда быйыл бошалыргъа керекдиле.

Звездный поселокда амбулатория ишленирикди, къурулушчула анда ишлерин бу кюнледе башларыкъдыла. Андан сора да Нальчикде 10 минг квадрат метри болгъан биринчи поликлиниканы къурулушу бошаллыкъды, анда тынгылы диагноз ара эм битеу анализлени тохташдыргъан шёндюгюлю лаборатория да боллукъду. Жангы поликлиникада амбулатория халда онкология болушлукъ берген ара, эндоскопия хирургия бёлюм эмда  саусузла кюндюз жатхан  жер да ишлерикди.

 Онкология диспансерни къурулушу андан ары бардырылады, дагъыда  Республикалы клиникалы больницаны биринчи болушлукъ берген стационар бёлюмюню 1,2 квадрат метр боллукъ мекямында ишле белгиленнген мардагъа кёре барадыла, ол  хирургия бёлюмню бла Тамырланы бакъгъан регион ара бла бирге къошуллукъду, деп айтылады билдириуде.