Жылны ахыры эсеплени чыгъарыуну, тамамланнган жумушланы белгилеуню эмда келир кезиуге муратла салыуну заманыды. Элбрус районну жер-жерли администрациясыны башчысыны къуллугъун толтургъан Сотталаны Къурман район 2023 жылны къаллай жетишимле бла бошагъаны бла шагъырей этгенди.
- Къабарты-Малкъарны жамауаты эм «Заман» газетни сыйлы окъуучулары! Жангы жыл бла жюрегимден алгъышлайма. Келе тургъан жыл жетишимле, насып эм къолайлыкъ келтирсин. Хар бирибиз да келир заманнга ышаннгылы кёзден къарарча эмда муратларыгъыз толурча болсун.
Быйыл Элбрус районнга хайырлы болгъанын айтыргъа сюеме. Жылны ичинде кёп магъаналы жумушла толтурулгъандыла. Ол санда Элбрусда амбулатория ишлетилгенди. Алай бла энди элде эки амбулатория барды. «КъМР-де билим бериуню школ системасын тынгылы жангыртыу» регион проектни чеклеринде Нейтринода, Элбрусда, Быллымда, Тырныауузда 3-чю номерли школлада жангыртыу жумушла толтурулгъандыла.
«Эллени тынгылы айнытыу» федерал программаны болушлугъу бла Къулийланы Къайсын атлы маданият юйде тынгылы тапландырыу ишле бардырылгъандыла, Элбрусда Маданият юйню бла спорт комплексни мекямларыны къурулушлары башланнгандыла. Арбазланы бла адамла бирге солугъан жерлени тапландырыу жаны бла программаны болушлугъу бла Тырныауузда «Кюнчюк» солуу эм культура парк, Быллымда эм Кёнделенде скверле жангыртылгъанларын айтыргъа сюеме.
Кёнделенде «Акъыллы майдан» ишлеп башлагъанды, ол «Спорт – жашауну мурдору» программаны чеклеринде къуралгъанды. Энтта бир магъаналы жумуш – Гирхожан- Суу черекден жаяу ётерча кёпюр ишленнгенди. Районда кёп къатлы юйледе эски болгъан 30 лифт алышыннганды. Бу иш а КъМР-ни Башчысы Казбек Коковну буйругъу бла тамамланнганды.
Магъаналы проектлени арасында «Гипсолит» предприятие ишлеп башлагъаны энчи жерни алады.
Жолланы тапландырыу жаны бла да кёп ишле толтурулгъандыла. «Къоркъуусуз эм качестволу жолла» миллет проектни болушлугъу бла «Шхельда» эм «Жантуугъан» альпинист лагерьлеге жолла жангыртылгъандыла. Огъары Бахсанда уа медпунктха, сабий садха, межгитге элтген жолну тынгылы жангыртып башлагъанбыз. Элбрусда да юч орам излемлеге келишдирилгенди. Регионну жол фондуну ахчасына Тырныауузда Молодёжный переулок излемлеге келишдирилгенди.
Азауну айбатландырыу жумушланы толтуруп, алайда ярмарка къуралгъанды. Анда сатыу-алыу бардырырча 56 жер барды. Жайда уа экология жаяу жолланы 30 километринде навигация оборудование салыннганды. Ол санда бийик тау жерлеринде да.
«Эльбрус» курортда машинала бирге жыйылып, чырмау болмазча мадарла да толтурулгъандыла – къонакъ юйлени жанлары бла жолла тартылгъандыла эмда машинала салынырча энчи жер къуралгъанды. Анда уа 800 машина сыйынырыкъды.
Курортда шёндюгю излемлеге келишген юч канат жол ишлейди, аланы битеулю узунлугъу 5 километрге жетеди. Тау лыжалада учарча трассаланы узунлугъу уа 17 километрди, Россейде эм бийик трассала бизни районда орналыпдыла.
Мен жылны ичинде тамамланнган жумушланы жаланда аз кесегини юсюнден айтханма. 2024 жылда уа районну айнытыу жаны бла энтта кёп иш толтурургъа белгиленеди.
Тикаланы Фатима.
