- Озуп баргъан жыл Черек районнга ахшы жумушла тамамланнган кезиу  болгъанын айтыргъа сюеме.  Биринчиден, Черек районну жамауаты, районну эм эллени жер-жерли советлерини депутатлары да тири къатышып, СВО-да жерлешлерибизге болушлукъ этип тургъанбыз. Ол санда рацияла, тепловизорла, дроннга илишанла, дизель генератор, къурулуш материалла, дарманла, аш-суу алыннгандыла. Дагъыда къыйын жолладан ётерча 5 машина да бергенбиз. Бу жумушлагъа 11 миллион сом къоратылгъанды. Районну халкъына бу жумушха себеплик этгени ючюн ыразылыгъымы билдирирге сюеме.
Мобилизация бла чакъырылгъанлагъа бла аланы юйюрлерине социал болушлукъ этиуге мен кёз-къулакъ болгъанлай турама. Энчи аскер операциягъа къатышхан инсанларыбызны юйюрлерине эллишер минг сом юлеширге онгубуз болгъанды,  бу жумушлагъа 2,5 миллион сом къоратылгъанды. Донецк, Луганск республикалагъа бла Запорожье эм Херсон областьлагъа 80 тонна жандауурлукъ жюк  ашырылгъанды.  
Федерал эм регион программаланы болушлукълары бла районда ахыр кезиуде кёп магъаналы ишле толтурулгъандыла. «Шёндюгю шахар болум» программаны чеклеринде кёп къатлы юйлени арбазлары бла адамла бирге солугъан жерле жангыртылгъандыла. Бу жумушлагъа 21,2 миллион сом къоратылгъанды – 12 объект тап халгъа келтирилгенди.
Аушигерде «Сатушир-Аушигер» суу ызны тартыу ахырына жетдириледи. Ол «Къашхатау-Аушигер» суу ызны кенгертирикди. Бу магъаналы ишлеге 109,8 миллион сом бёлюннгенди. Объектни узунлугъу 11 километрге жетеди. 
 «Саулукъ сакълауну биринчи бёлюмюн тынгылы жангыртыу» программаны болушлугъу бла Аушигерде амбулатория битдирилгенди. «Саулукъ сакълауну айнытыу» къырал программаны чеклеринде уа Черек районну ара больницасыны поликлиника бёлюмю жангыртылгъанды. 
«Эллени тынгылы жангыртыу» федерал къырал программагъа кирип, школгъа дери билим берген «Нюр»  учрежденияны тапландырыргъа эмда Газель Некст автобус сатып алыргъа къолдан келгенди. Аушигерде Маданият юй ишлетилгенди. «Билим бериу» миллет проект а Бызынгыда орта школну спорт залын тынгылы жангыртыргъа онг бергенди. 
   Жаш тёлю ара да къуралгъанды. Аны мекямын жангыртыугъа   16,7 миллион сом бёлюннгенди. «Маданият» миллет проектни   чеклеринде Огъары Малкъарда Маданият юйге ремонт этилгенди, арбазы айбатландырылгъанды, районда модель библиотека да къуралгъанды. 
«Ата журтубузну къоруулай жан бергенлени атларын ёмюрлюк этиу» федерал программа Къашхатауда, Огъары Малкъарда, Бызынгыда, Бабугентде, Аушигерде батыр жерлешлерибизни хурметине ишленнген эсгертмени тап халгъа келтирирге себеплик этгенди. 
Бизде спорт бла кюреширча 49 объект барды, эки спорт школ  ишлейди, алада 1,3 мингден аслам адам кюрешеди. Аны нек айтама: Къашхатауда жангы спорт комплексге халкъны сейири уллуду. Анда бассейн болгъанын энчи белгилерге сюеме. Къашхатауда тутушуу эм бокс  бла кюрешген зал, Аушигерде спорт зал, Бабугентде тутушуудан  жараула бардырылгъан зал тап халгъа келтирилгендиле. 
«Къоркъуусуз эм качестволу жолла» программаны чеклеринде «Эски Черек-Жемтала-Сукан-Суу» трасса тап халгъа келтирилгенди, аны узунлугъу 19,4 километрди. Аны Зарагиж элде кесегинде чыракъла салыннгандыла, тротуарла къуралгъандыла.
 «Эллени тынгылы жангыртыу» къырал программаны болушлугъу бла Бабугентде,  Бызынгыда, Огъары Малкъарда жолла тапландырылгъандыла. Бюгюнлюкде уа Огъары Малкъарда Мухолгъа элтген жолну жангыртыу ишле толтуруладыла – кёпюрню къурулушу андан ары барады. 
Черек районда туризмни айнытыргъа битеу онгла бардыла. Къонакъбайлыкъ  бла бюгюнлюкде гитче эм орта бизнесни 45 предприятиясы ишлейдиле.  Къонакъла бютюнда Аушигерде жылы суулагъа, Чирик кёллеге, Огъары Малкъаргъа, Уштулугъа кёп келедиле. «Бызынгы» альпинист базагъа уа регионладан эм тыш къыралладан келедиле къонакъла. Былтыр  районда 185 минг адам   солугъанды. Быйыл а аланы саны 200 мингден да озарыгъы белгиленеди. 
Ма быллай жетишимлерибиз бла ёхтемленирге боллукъбуз. Черек районну халкъыны атындан республиканы жамауатын байрам бла алгъышлайма, саулукъ, насып, жангы жетишимле, муратла толурларын тежейме. 

Тикаланы Фатима.