КъытщIэхъуэ щIэблэр хэкупсэу гъэсэным гулъытэ хэха щигъуэт мы лъэхъэнэм а лэжьыгъэр нэхъри егъэфIэкIуэным Iэмал куэд хуагъэпс. «Чы щIыкIэ къыумыгъэшар бжэгъу хъуа нэужь къыпхуэгъэшыжынукъым», - жыхуиIэращи, къызыхэхъуа уна- гъуэм сабийм щыдаубла гъэсэныгъэм адэкIэ япэу пызыщэ IуэхущIапIэхэм ящыщщ ахэр зэкIуалIэ садхэр. Мыбдеж къыщыхэгъэщыпхъэщ, а гъэсапIэхэм щылажьэ дэтхэнэми (унафэщIымкIэ къыщы- щIэдзауэ хъумакIуэм деж щиухыжу) ябгъэдэлъ Iуэху зехьэкIэ мардэхэм куэдкIэ зэрелъытар абыхэм я нэIэ зытет цIыкIухэм я дуней еплъыкIэри гупсысэри зэтеувэнымкIэ. Псом хуэдэжкъым гъэсакIуэхэмрэ абыхэм я дэIэпыкъуэгъу гъэсакIуэ нэхъыщIэхэмрэ.
Иужьрейхэм ябгъэдэлъ щIэныгъэмрэ зэфIэкIхэмрэ наIуэ къыщыхъу зэпеуэ хьэлэмэт иджыблагъэ щекIуэкIащ Лэскэн щIыналъэм. Ар къызэрагъэпэщащ егъэджэныгъэмкIэ район IэнатIэм егъэджэныгъэмрэ гъэсэныгъэмкIэ и къудамэм и IэщIагъэлIхэм. Абы и мурад нэхъыщхьэр гъэсакIуэ нэхъыщIэ нэхъыфIхэр утыку къишэн, ябгъэдэлъ зэфIэкIхэр наIуэ щIын, творческэу лэжьыгъэм зэрыбгъэды-хьэр къэгъэлъэгъуэн, Iуэху зехьэкIэ мардэхэмкIэ зэдэгуэшэн, гъэсакIуэ нэхъыщIэм и пщIэр жылагъуэм къыщыIэтын Iуэхугъуэхэм ехьэлIат. Зэпеуэ хьэлэмэтым и къызэгъэпэщакIуэхэм ящыщ, егъэджэныгъэмкIэ щIыналъэ къудамэм и лэжьакIуэ пашэ Хьэфиз Жаннэ зэрыжиIэмкIэ, Iуэхум хэтыну гукъыдэж зыщIа гъэсакIуэ нэхъыщIитхум ящыщ дэтхэнэри хуэфащэ дыдэт зыпэрыт IэщIагъэм. Нэры-лъагъут абыхэм я IэщIагъэмкIэ щIэныгъэфI зэрабгъэдэлъыр, зэфIэкI лъагэхэри зэраIэр.
ГъэсакIуэ нэхъыщIэхэр унэтIыныгъэ зыбжанэкIэ зэпеуащ. Апхуэдэхэт, къапщтэмэ, «Сэлам фызох. Мыр сэращ!», «IэщIагъэмрэ санитар-эпидемиологие хабзэхэмрэ», «Сабийхэм ерыскъы Iэ-нэр къазэрыхузэгъэпэщыпхъэр», «Лэжьыгъэмрэ творчествэмрэ» унэтIыныгъэхэр, нэгъуэщIхэри. А Iуэхугъуэхэм къызэщIиубыдэу районпсо зэпеуэм хэт дэтхэнэ гъэсакIуэ нэхъыщIэми утыкушхуэм щагъэлъэгъуащ сабийхэм зэрадэлажьэ щIыкIэхэр.
КъыпхуэмыIуэтэным хуэдиз гукъыдэжрэ дэрэжэгъуэрэ ягъуэтащ зэпеуэм кIэлъыплъахэм, апхуэдиз Iуэхугъэ хьэлэмэтхэмкIэ, купщIафIэхэмкIэ ар гъэнщIауэ щытати. Псом хуэмыдэу Iуэхум хуэнабдзэгубдзаплъэт къэпщытакIуэ гупыр. Абы хэтт зи цIэ къитIуа къуда- мэм и унафэщIхэмрэ IэщIагъэлIхэм- рэ, Лэскэн районым и сабий садхэм я гъэсакIуэ пашэхэр, методистхэр. Утыкум щекIуэкIа псоми гупсэхуу щыгъуазэ зыхуащIа нэужь, къэпщытакIуэхэм ягъэбелджылащ фIыхэм я фIыжу къалъыта гъэсакIуэ нэхъыщIэр. Апхуэдэ хъуащ зэпеуэм и япэ увыпIэр зыхуагъэфэща Мэсей Заринэ. Ар гъэсакIуэ нэхъыщIэу щолажьэ Лэскэн ЕтIуанэ къуажэм дэт сабий садым (унафэщIыр Къумыкъу Эльвирэщ).
- КъэпщытакIуэ гупым хэт псори дызэдэарэзыуэ текIуэныгъэр зыхуэдгъэфэща Мэсей Заринэ, ди гуапэ зэрыхъущи, зи лэжьыгъэм хуэIэижь, абы творческэу бгъэдыхьэ, щIэщыгъуагъ хэзылъхьэ лэжьакIуэщ. Зэ еплъыгъуэкIэ, гъэсакIуэм и дэIэпыкъуэгъу къудейщ жаIэми, абыхэми лэжьыгъэшхуэ щагъэзащIэ садым. Ахэри йолIалIэ цIыкIухэм я хьэл-щэныр зэтеувэным, я щхьэ хьэрычэт хуащIэжыфрэ я Iуэху дагъэкIыжыфу къэтэджыным. Нэрылъагъу зэрыхъуащи, Заринэ сабийхэм яхуэсакъ, ахэр зыхуей хуэзыгъазэ, пэшхэм я къабзагъэм кIэлъыплъ къудейкъым, атIэ гъэсэныгъэ лэжьыгъэми хуэжыджэр, абыкIэ щIэныгъэ зыбгъэдэлъ цIыхущ. Утыкушхуэм нуру щыблэу ита Мэсейм дохъуэхъу ехъулIэныгъэщIэхэр зыIэригъэхьэну, и цIэр фIыкIэ иджыри куэдрэ зэхэтхыну, - жиIащ Хьэфиз Жаннэ. - Хуабжьу си гуапэщ ди сабийхэм ядэлажьэхэм зэпеуэм и утыкум ита гъэсакIуэхэм хуэдэ куэд зэрахэтыр. Абы гугъэфI уегъэщI щIэблэ узыншэ щIыналъэм къызэрихъуэнумкIэ.
Районпсо зэпеуэм щытекIуа Мэсей (Шагъыр) Заринэ Лэскэн ЕтIуанэм дэт курыт школыр ехъулIэныгъэкIэ къиухри, и щIэныгъэм щыхигъэхъуащ КъБКъУ-м и нэIэм щIэт еджапIэхэм ящыщ зым икIи «архив лэжьакIуэ» IэщIагъэр зригъэгъуэтащ. Апхуэдэу хъуами, пщащэ цIыкIум игу илът зэрысабийрэ зэхъуапсэу щыта IэщIагъэр зригъэгъуэтынуи, гъэсакIуэ, макъамэмкIэ егъэджакIуэ IэщIагъэхэм хуеджэжащ. Мы зэманым Заринэ щIэныгъэ нэхъыщхьэ щызрегъэгъуэт Москва дэт информационно-технологие университетым педагогикэмкIэ и къудамэм. Заринэ унагъуэщ, ар Мэсейхэ я ны- сэщ, и щхьэгъусэ Беслъэнрэ абырэ бынищ яIэщ.
- Си гуапэу, сфIэгъэщIэгъуэну сыхэтащ гъэсакIуэ нэхъыщIэхэм я щIыналъэпсо зэпеуэм. Абы зыщыхуэзгъэхьэзырым сэбэпышхуэ къысхуэхъуа ди садым и унафэщIхэм, ди гъэсакIуэ нэхъыжь Елмырзей Олеся сымэ фIы-щIэ ин яхузощI. Дызыпэрыт лэжьыгъэмкIэ дбгъэдэлъ щIэныгъэри зэфIэкIхэри щыдгъэлъэгъуащ, Iуэху зехьэкIэ мардэхэмкIэ дыщызэдэгуэшащ зэпеуэм и утыкум. Абыхэм ящыщ куэд, дауи, ди лэжьыгъэм къыщыдгъэсэбэпынущ дяпэкIэ. ЖыпIэнурамэ, сэ схуэ-дэ лэжьакIуэхэр дыхэтщ, дыщопсэу сабийхэм я дуней телъыджэм. Ар лъэныкъуэ куэд къызэщIэзыубыдэ гъа- щIэ хьэлэмэтщ, - жеIэ Заринэ. - Си текIуэныгъэр хузогъэфащэ си анэкъилъху закъуэ, СВО-м хэту дзэм къулыкъур щезыхьэкI си дэлъху Залым икIи сыхуохъуауэ узыншэу унагъуэм къахыхьэжыну.
Езы Заринэ и текIуэныгъэмкIэ гуапэу йохъуэхъу къыдэлажьэхэр, сабий садым и унафэщIхэр, зэрыс унагъуэм тхьэмадэрэ гуащэу щиIэ Мэсейхэ Русланрэ Алфусэрэ, и адэ-анэ Шагъырхэ Зауррэ Светланэрэ. Дэри дыдогуфIэ зи лэжьыгъэм творческэу, щIэщыгъуагъ хэлъу бгъэдыхьэ, ар нэжэгужэу езыхьэкI бзылъхугъэ цIыкIум. ЕхъулIэныгъэщIэхэр зыIэрыбгъэхьэну, зэбгъэгъуэт щIэныгъэ нэхъыщхьэм и хъерышхуэ плъагъуну, уузыншэу, унагъуэ насыпрэ бын гуфIэгъуэрэ ущымыщIэу куэдрэ упсэуну, сабийхэм я дуней телъыджэм жыджэру хэт, ар зыгъэдахэ Заринэ.
ЖЫЛАСЭ Маритэ.