Адыгэ Республикэм и Лъэпкъ музейм зэIущIэ гъэщIэгъуэн щекIуэкIащ. Абы зы пщыхьэщхьэ щызэхэсащ ныбжьыщIэхэр. «Жэщщыс» зыфIаща зэIущIэм куэд кърагъэблэгъащ, Iуэхугъуэ зэмылIэужьыгъуэхэм щытепсэлъыхьащ, гъащIэм, псэукIэм, зэхэтыкIэм теухуауэ упщIэ зиIэхэм жэуап иратащ нэхъыжьхэм.
Жэщщысыр иригъэкIуэкIащ лъэпкъ гъуазджэм и дунейм фIыуэ къыщацIыху Нэ-гуэрокъуэ Къазбэч. Апхуэдэуи уэрэдыжьхэр жиIащ, шыкIэпшынэр игъэбзэрэбзащ, къамылым епщэурэ макъамэ дахэхэр къригъэкIащ.
Адыгэ Республикэм лъэпкъ IуэхухэмкIэ, хамэ къэралхэм щыпсэу ди лъэпкъэгъухэм хуаIэ зэпыщIэныгъэхэмкIэ, хъыбарегъащIэ IэнатIэхэмкIэ и комитетым и унафэщI Щхьэлахъуэ Аскэр пшыхьыр къыщызэIуихым жиIащ:
- «Жэщщысым» адыгэ щэнхабзэм щиубыд увыпIэр къэгъэнэIуэныр, абы епха хабзэхэр къэIэтыжыныр пшэрылъу зыхуэдгъэувыжауэ аращ дэ. НыбжьыщIэхэр бгъэущиинымкIэ, уадэлэжьэнымкIэ, иджырей щыIэкIэ-псэукIэм къигъэув Iуэхугъуэхэм хуэбгъэIущынымкIэ жэщщысым сэбэпынагъ куэд пылъщ. Апхуэдэуи адыгэ гупсысэкIэр, адыгэбзэр, адыгэ щэнхабзэр, хабзэр хъумэнымкIэ, зегъэужьынымкIэ IэмалыфIщ. Мыпхуэдэ ныбжьыщIэ зэхыхьэхэр дяпэкIэ нэхъыбэрэ зэхэтшэнущ.
Филологие щIэныгъэхэмкIэ доктор, профессор Унэрокъуэ Рае къызэхуэсахэм захуигъэзащ: «Жэщщысыр ныбжьыщIэ зэхыхьэщ, нэхъапэм апхуэдэ-хэр пщащэ цIэрыIуэхэм я унэм щызэхашэрт. Унагъуэм ис бзылъхугъэ нэхъыжъхэр щIалэгъуалэм якIэлъыплъырт, яхуэсакъырт.
Пщыхьэщхьэм ныбжьыщIэхэр нэIуасэ щызэхуэхъурт, джэгухэрт, къафэхэрт, щызэдэгушыIэрт. ЩIалэхэм гъуэмылэ яIыгъыу къызэхуэсырти, нэху къатещхьэху зэдэгушыIэжу зэхэст. Иджыри апхуэдэ жэщщыс къызэбгъэпэщын хъумэ, хабзэ псоми тету, абы и къалэнхэр игъэзащIэу щытын хуейщ. Нобэрей ди зэIущIэми дыщытепсэлъыхьынущ ди щIалэгъуалэм яхэлъ хьэл-щэным, зэрахьэн хуей хабзэм, псэлъыхъу зэхуэхъуа ныбжьыщIэхэм я зэхущытыкIэм, нэхъыжьхэм яхуэщIын хуей пщIэм, нэгъуэщIхэми».
Хуабжьу щIэщыгъуэу, гум жьы дригъэхуу, уи нэгу зригъэужьу екIуэкIащ жэщщы-сыр. НыбжьыщIэхэр къафэм-рэ пшынэмрэ щыкуэду, гушыIэкIэ дахэхэр яIэу зэрызэхэсам нэмыщI, жэщщысыр къызэзыгъэпэщахэм къыхалъхьа зэхьэзэхуэри гъэщIэгъуэн хъуат.
УсакIуэ Дзыбэ Саниет и усэхэм къеджащ, тхыдэ щIэныгъэхэмкIэ кандидат, АКъУ-м и егъэджакIуэ Цей Заремэ адыгэ къафэм и хабзэхэм щигъэгъуэзащ, Лъэпкъ музейм и щIэныгъэ лэжьакIуэ нэхъыжь Тау Аслъэн «Адыгэ кIэн» джэгукIэр зыхуэдэр яригъэлъэгъуащ икIи игъэджэгуащ. «Мыст» ныбжьыщIэ уэрэджыIакIуэ гупми пшыхьыр ягъэдэхащ. ЦIэ хьэлэмэт зыфIэзыщыжа музыкант гупыр къызэрыгуэкIкъым, атIэ цIыхубэм ящыгъупщэжа уэрэдыжьхэм псэ халъхьэж, ар яфIэгъэщIэгъуэну уэрэджыIакIуэхэм ядежьууащ пшыхьым кърихьэлIахэр.
Зэпеуэм хэтахэм я зэфIэкIыр къапщытащ АР-м лъэпкъ IуэхухэмкIэ, хамэ къэралхэм щыпсэу ди лъэпкъэгъухэм хуаIэ зэпыщIэныгъэхэмкIэ, хъыбарегъащIэ IэнатIэхэмкIэ и комитетым и унафэщI Щхьэлахъуэ Аскэр (къэпщытакIуэ гупым и пашэт), Адыгэ Хасэм и тхьэмадэ ЛIымыщэкъуэ Рэмэзан, Дунейпсо Адыгэ Хасэм и Хасащхьэм хэт МэшхуэфI Нэждэт, спортымкIэ мастер, Урысеймрэ Адыгеймрэ щIыхь зиIэ я тренер, ДАХ-м и ГъэзэщIакIуэ гупым хэт Хъуэт Юныс, АР-м щIыхь зиIэ и журналист ТIэш Светланэ сымэ. Пшыхьым къыщыхэжаныкIахэм саугъэтхэр иратащ.
Зэхуэсым и кIэухым псоми зэгъусэу «Си нанэ» адыгэ уэрэд цIэрыIуэр щыжаIащ икIи джэгу дахэкIэ зэхуащIыжащ.
Жэщщысым ныбжьыщIэхэр нэхъ зэпэблагъэ, зэныбжьэгъу зэрищIыр наIуэ къэхъуащ а пщыхьэщхьэм. Абы щапхъэ трахыу адыгэ зэрыс хэгъэгухэм апхуэдэ пщыхьэщхьэхэр щрагъэкIуэкIыну сэбэпт.
НэщIэпыджэ Замирэ.