УФ-м и Президент Путин Владимир иригъэкIуэкIа Къэрал советым и зэIущIэм КъБР-м и Iэтащхьэ КIуэкIуэ Казбек хэтащ.
ЗэIущIэм къыщаIэта Iуэхугъуэ нэхъыщхьэу щытар егъэджакIуэмрэ унэтIакIуэмрэ я пщIэм адэкIи хэгъэхъуэн зэрыхуейрщ. Зэхуэсым къыщыпсэлъащ егъэджэныгъэмкIэ министр Кравцов Сергейрэ Къэрал советым и «Егъэджэныгъэ» къудамэм и унафэщI Развожаев Михаилрэ.
Къэралым и унафэщIым гулъытэшхуэ хуищIащ егъэджэныгъэ IэнатIэм щылажьэ псоми я улахуэм хэгъэхъуэн зэрыхуейм. Абы къыхигъэщащ хэкупсэ гурыщIэр сабийхэм хапщэн папщIэ, дзэ Iуэху хэхам хэтхэр езыгъэджахэмрэ зыгъэсахэмрэ я бгъэдыхьэкIэр къагъэщхьэпапхъэу зэрыщытыр. ЩIыналъэ щхьэхуэхэм я унафэщIхэм Президентым унафэ яхуищIащ егъэджакIуэхэмрэ гъэсакIуэхэмрэ нэ лейкIэ еплъыну, зыхуей псомкIи къызэрагъэпэщыну.
ЗэIущIэм мыхьэнэшхуэ зэриIэм щытепсэлъыхьыжым, КIуэкIуэ Казбек жиIащ: «Иужьрей илъэсхэм ди республикэм егъэджакIуэхэмрэ гъэсакIуэхэмрэ лэжьыгъэм зэрытрагъэгушхуэ IэмалыщIэхэр къыщыкъуэкIащ. 2021 гъэм щегъэжьауэ, егъэджакIуи 100-м щIигъум КъБР-м и Iэтащхьэм и мылъку саугъэт иратащ, щIыналъэмрэ къэралымрэ щекIуэкIа зэпеуэхэм къызэрыщыхэжаныкIам папщIэ. Илъэс ещанэ хъуауэ егъэджакIуэхэм я улахуэм хагъахъуэ. Ар къызэрапщытэ IэмалыщIэхэр ягъэлэжьэн щIадзащ. Я лэжьыгъэм зыкъыдагъахуэу, къуажэ школхэм физикэр, химиер, информатикэр щезыгъэджхэм я ахъшэм хагъахъуэ. Школхэр и чэзум зэрызэрахьэм и фIыгъэкIэ, егъэджакIуэхэм я лэжьыгъэр хуиту щрагъэкIуэкIыфын пэшкIэ къызэгъэпэща хъуащ. Президентыр зытепсэлъыхьа лъэныкъуэ псори республикэм къыщаIэта жэрдэмхэри нэгъэсауэ ягъэзэщIэнущ».
Къэбэрдей-Балъкъэрым егъэджакIуэмрэ унэтIакIуэмрэ я илъэсыр IуэхуфIкIэ гъэнщIауэ щекIуэкIащ. Егъэджэныгъэм епха IуэхущIапIэхэм я унафэщIхэм, егъэджакIуэ щIалэхэм, щIэныгъэ щхьэхуэхэр щIэблэм езытхэм папщIэ зэхуэс куэд къызэрагъэпэщащ. Республикэм и егъэджакIуэхэм IэщIагъэм фIыуэ зэрыхащIыкIыр къагъэлъэгъуащ щIыналъэми къэралми щекIуэкIа зэхьэзэхуэхэм зэрыщытекIуамкIэ. Псалъэм папщIэ, Налшык къалэм дэт лицей №2-м физикэр щезыгъэдж Къэшэж Аслъэн къэрал псом цIэрыIуэ щыхъуащ, «Классная тема» урысейпсо зэпеуэм япэ увыпIэ къыщихьа нэужь.