ИлъэсыщIэм ирихьэлIэу, КъБР-м и Парламентым зэрихабзэу республикэм и лэжьакIуэ нэхъыфIхэр егъэпажэ. Парламентым и ЩIыхь тхылъхэмрэ абы и Уна­фэщIым и ФIыщIэ тхылъхэмрэ дыгъуасэ хуагъэфэщащ цIыху 70-м щIигъум.

- Си гуапэу фыкъызогъэблагъэ республикэм и хабзэубзыху орган нэхъыщхьэм. ЗэрыфщIэщи, 2023 гъэр, иужьрей илъэсхэми хуэдэу, тынштэкъым, ауэ ар мыхьэнэ зиIэ IуэхугъуэшхуэхэмкIэ гъэнщIауэ щытащ, - жи­Iащ къызэхуэсахэм защыхуигъазэм КъБР-м и Парламентым и УнафэщI Егоровэ Татьянэ. - Языныкъуэ къэралхэм Урысейм къы­зэ­рыпэщIэувэ Iэмалхэм иджыри пащэми, ди Хэкум зеузэщI, ипэкIэ мэкIуатэ. Ди псэукIэр нэхъыфI зыщI лъэпкъ парт проектхэр, федеральнэ къэрал программэхэр догъэзащIэ, егъэджэныгъэм, щэнхабзэм, узыншагъэр­ ­хъумэным, спортым епха IэнатIэщIэхэр доу­хуэ, ди уэрамхэмрэ пщIантIэхэмрэ зыхуей ­худогъазэ. Ар лэжьыгъэшхуэщ икIи апхуэдэ Iуэхухэр къыдэхъулIэным, шэч хэмылъу, мыбдеж щIэс дэтхэнэми и гуащIэ хэлъщ. Нобэ ­къедгъэблэгъащ егъэджакIуэхэм, дохутырхэм, щIыуэпсым телажьэхэм, социальнэ IэнатIэм, щIэныгъэм, щэнхабзэм, жылагъуэ Iуэхухэм, шынагъуэншагъэр къызэгъэ­пэ­щыным пэрытхэм ящыщ куэд. Фи лэжьыгъэр зэмыщхьми, зы Iуэхум фызэрегъэуIу - ар фи зэмани къаруи фемыблэжу фи къалэнхэр гурэ псэкIэ зэрывгъэзащIэрщ. Си фIэщ мэхъу адэкIи фи зэфIэкIым зэрыхэвгъэхъуэнур, республикэм и зыужьыныгъэм фызэ­ры­те­лэжьэнур. Сыхуейт фызыхэт гупхэми фIыщIэ яхуэсщIыну, зэгъусэу дылажьэмэщ ехъулIэ­ныгъэшхуэхэр щыдиIэнур. Къэблагъэ илъэ­сыщIэм IуэхуфIхэмрэ фи мурадхэмрэ къы­щывэхъулIэну сынывохъуэхъу, мамыру, бэIу­тIэIуншэу, гукъыдэжрэ узын­шагъэрэ фиIэрэ фIыщIэгушхуэн фи гъащIэм куэду хэту фыпсэуну си гуапэщ. 
2023 гъэр ЕгъэджакIуэмрэ унэтIакIуэмрэ я илъэсу зэрыщытар къалъытэри, КъБР-м и Парламентым и ЩIыхь тхылъыр республикэм и егъэджакIуэ гупыфIым хуагъэфэщащ. Абыхэм ящыщщ: Аруан районым хыхьэ Къэхъун къуажэм и курыт школ №2-м адыгэбзэмрэ адыгэ литературэмкIэ и егъэджакIуэ Бекъшокъуэ Лалусэ, Тэрч къалэм и курыт еджапIэ №3-м урысыбзэмрэ литературэмкIэ щезы­гъаджэ ФиIэпщэ Людмилэ, Налшык ­къалэм и курыт школ №10-м балъкъэрыбзэмрэ литературэмкIэ и егъэджакIуэ Газаевэ ФатIимэ, Налшык къалэм и курыт еджапIэ №33-м пэщIэдзэ классхэм я егъэджакIуэ Москвитинэ Татьянэ, Тэрч районым и Тамбовскэ ­къуажэм и курыт школым урысыбзэмрэ ли­тературэмкIэ и егъэджакIуэ Багъэтыр Iэмират, Налшык къалэм и курыт еджапIэ №23-м урысыбзэмрэ литературэмрэ щезыгъэдж Жыгун Мадинэ, Налшык къалэм и курыт еджапIэ №6-м и пэщIэдзэ классхэм я егъэджакIуэ Дмитрян Жаннэ, нэгъуэщIхэри.
Апхуэдэуи щIэныгъэмрэ егъэджэныгъэмрэ хэлъхьэныгъэ зэрыхуищIым папщIэ КъБР-м и Парламентым и ЩIыхь тхылъыр иратащ ЕгъэджэныгъэмкIэ «Педагогика» Урысей академием и щIэныгъэ журналым и редактор нэхъыщхьэ Бозий Руслан. Щэнхабзэм щаIэ зэфIэкIхэм папщIэ ягъэлъэпIащ Къэбэрдей-Балъкъэр къэрал филармонием и симфоническэ оркестрым хэт артист пажэхэу Къэзанш Оксанэрэ Павловэ Иннэрэ. Республикэм и хабзэубзыху орган нэхъыщхьэм и ЩIыхь тхы­лъыр хуагъэфэщащ «Къэббалъкъэнерго» акционер зэгухьэныгъэм, Тэрч налмэс заводым, Налшык къалэм и щIыпIэ администрацэм, КъБР-м ЩIыуэпсымрэ экологиемкIэ и министерствэм я лэжьакIуэхэми, нэгъуэщI куэдми.
КъБР-м и Парламентым и УнафэщIым и ФIыщIэ тхылъыр иратащ республикэм и экономикэм, гъуэгу, социальнэ IэнатIэхэм, физическэ щэнхабзэмрэ спортымрэ хэлъхьэ­ныгъэ хуэзыщIхэм.
Дамыгъэхэр зратахэм ехъуэхъуащ КъБР-м и Парламентым и УнафэщIым и къуэдзэхэу Жанатаев Сэлимрэ Къардэн Муратрэ. Абыхэм къыхагъэщащ зэфIэкI зыбгъэдэлъ цIыху Iущхэр, ди щIыналъэм и къэкIуэнур зэлъытахэр ялъагъуныр зэрагуапэр. ТIуми илъэсыщIэ хъуэхъукIэ зыхуагъэзащ кърагъэблэгъахэм.
ЗэIущIэр Егоровэ Татьянэ иухащ мыпхуэдэ псалъэхэмкIэ: «Дропагэ фи зэфIэкIым. Фи лэжьыгъэм хуэфащэ дыдэщ Парламентым и дамыгъэ лъапIэхэр. Мы зэман мытыншым дэтхэнэри щIыналъэр зэревгъэфIэкIуэнум фыпылъщи, фи ехъулIэныгъэхэм хэхъуэ зэпыту екIуэкIыну ди гуапэщ. Дэ дэлъытаращи, хабзэ и лъэныкъуэкIэ зыфщIэдгъэ­къуэнщ».
БАГЪЭТЫР Луизэ.