Бу кюнледе Нальчикде Сабийлени эмда жаш тёлюню чыгъармачылыкъларыны къаласында жырны битеуроссей конкурсуну регион кесеги ётгенди. Анга республикадан он школ коллектив къатышханды. Къалада сабийлени жыргъа юйретген бёлюмню методисти Къулийланы Жаннет айтханнга кёре: «Бу конкурс «Билим бериу» миллет проектге тийишлиликде «Хар сабийни да жетишими» деген федерал проектни чеклеринде бардырылгъанды. Аны мураты къыралны жыр байлыгъын сакълауду, сабий хор къымылдауну айнытыуду, кенг асламланы араларында жайыуду.
Конкурсха онсегиз жылларына дери сабийле къатышадыла, ол санда къыйын жашау болумгъа тюшген юйюрледен, санларында къыяулары болгъан, кёзсюз къызчыкъла бла жашчыкъла да.
Конкурсну жорукъларына кёре, хар коллектив да юч чыгъарманы айтыргъа керек эди. Ала бары да бир бирге ушаргъа керек тюйюлдюле. Тюрлю-тюрлю тилледе айтылгъан чыгъармалагъа инструментли ансамбльле сокъгъандыла, фонограмманы хайырланыргъа да эркинликлери бар эди.
Къызчыкълагъа бла жашчыкълагъа багъа берликле билим бериуню бла илмуну, маданиятны бла санатны келечилери эдиле. Аланы араларында жыр эксперт, Искусстволаны Шимал-Кавказ институтунда дирижёрлукъгъа юйретген Кючюкланы Роза эмда бу окъуу юйню колледжинден Усман Локманов да болгъандыла.
Алай бла жюрини оноууна кёре, биринчи жерге – Прохладна районну Прималкинское элинден «Калейдоскоп» жырчы къауум, экинчиге – Басхан районну Баксанёнок элинден «Радужные нотки», ючюнчюге да Хочуланы Эльмира башчылыкъ этген «Жулдузчукъ» чыкъгъандыла.
«Школ хор» бёлюмде уа жаланда бир коллектив бар эди. Ол да Нальчикде 20-чы номерли мектепден «Жашлыкъ» деген къауум болгъанды.
Хорланы араларында жерле уа былай юлешиннгендиле: биринчиге – «Жашлыкъ» эмда «Незабудки», экинчиге «Каприз» чыкъгъандыла, ючюнчю жер а эки коллективге жетгенди: «Жарыкъ макъамчыкълагъа» бла «Жетегейлеге».
Конкурсну регион кезиуюнде хорлагъанла эмда экинчи, ючюнчю жерлеге чыкъгъанла дипломла бла саугъаланнгандыла. Коллективлени хазырлагъан устазлагъа да къурау комитетни бюсюреу къагъытлары берилгендиле.
Конкурсха къатышханла Къулийланы Жаннетге эмда аны биргесине ишлеген Марлен Бжинаевге, башха специалистлеге фахмуларын ачыкъларгъа себеплик этгенлери ючюн ыспас сёзле айтхандыла.
Къараучула уа, жашчыкъла бла къызчыкъла сахнагъа керти да омакъ кийимле бла чыкъгъанларын белгилегендиле. Конкурсда совет композиторланы жырлары айтылгъанларын да чертгендиле. Ата-анала уа: «Сабийлерибиз не жаны бла да айнырча, жарыкъ болурча этерге керекбиз. Андан сора да, гаджетледен айырылып, макъамны, жырны дуниясына батсала игиди алагъа», -дегендиле.
Суратланы Холаланы Марзият алгъанды.
