Фахмулу жашыбыз Россейни Композиторларыны союзуну келечиси Малкъондуланы Ахмат озгъан жыллада аламат симфония чыгъармалары бла къууандыргъан эди. Бу кюнледе уа ол Искусстволаны Шимал-Кавказ къырал институтну «Арт-Идея» арасында «KONCERTO GROSSO» деген лекция бардыргъанды.
Тюбешиуде ол кесини чыгъармаларын къалай келишдирип жазгъанын, тыш къыраллада, Совет Союзда жашагъан композиторланы жашауларыны, чыгъармачылыкъ жолларыны юсюнден да билдиргенди.
Огъарыда сагъынылгъан KONCERTO GROSSO жанр онжетинчи ёмюрде белгили болгъанын айтханды. Ол тюрлю-тюрлю жанрла бирге къошулуп къуралып, аны бла кёп белгили композиторла хайырланнганларын да билдиргенди. Аланы санында дуниягъа белгили Иоганн Бах, Антонио Вивальди, Джордж Фридрих, Арканджело Корелли. Бу жанрны энчилиги – анда кёп тюрлю музыка инструментле бла да хайырланадыла, алагъа хар бирине да макъам жазылады. Ызы бла Ахмат ол белгили инсанланы чыгъармаларыны юзюклери бла шагъырейлендиргенди.
Совет Союзда уа аллай жанрда жазгъан Альфред Шнитке болгъанды. Ол композитор жангы жанрла да къурагъанды. Дуниягъа белгили болуп, тыш къыраллада да концертле бергенди. Жарсыугъа, атлары айтылгъан композиторла Л.Бетховен, Г.Малер, дагъыда башхала тогъузунчу симфонияларын жазгъанларында жашаудан кетгендиле. А. Шнитке да, ол санда болуп, тогъузунчу белгили чыгъармасын жаза тургъанында дуниясын алышханды. Аны ызындан ол симфонияны ахырына жетдирирге сюйген композитор да аны бошагъынчы ёлгенин да билдиргенди. Аны ючюн ол иш дуниягъа белгили болмай къалгъанды. Ызы бла Ахмат кесини чыгъармаларыны юсюнден да айтханды. Ол жазаргъа быллай белгили инсанланы ишлери бла кёлленнгенди.
Быллай лекцияланы хайыры бла уа адамла музыка бла танышадыла. Симфонияланы теренликлерин, ариулукъларын, неге жораланнганларын да ангылаяладыла, дейди ол. Ызы бла кеси жазгъан Саратовну Л. В. Собинов атлы къырал консерваториясыны оркестри сокъгъан концерти бла шагъырейлендиргенди.
Жыйылыуну ахырында педагог, СКГИИ-ни музыканы тарыхы эм теориясы кафедраны доценти Марианна Шериева битеу келгенлени атындан Ахматха ыразылыгъын айтханды. Быллай тюбешиулени къонакъланы чакъырып терк-терк къурай турургъа кереклисин, аланы хайыры бла адамланы музыка жаны билимлери ёсгенин да энчи чертгенди. Сора жаш композиторгъа иги иш башлагъанын айтып, мындан ары да аны бардырып турурун тежегенди.
Темуккуланы Амина.
Сурат авторнуду
