Нальчикде «Работа России» кадрла жаны бла республикалы арада энчи аскер операциягъа къатышып къайтханланы эмда аланы юйюрлери бла тюбешиу болгъанды. Ол «Единая Россия» битеуроссей политика партияны «Моя карьера с «Единой Россией» деген проектине кёре къуралгъанды. Анга КъМР-ни Урунуу эмда социал къоруулау министерствосуну бёлюмлерини башчылары, «Ата журтну къоруулаучулары» фондну келечилери да къатышхандыла.
Тюбешиуню башлай, Нальчикде социал къоруулау жаны бла араны таматасы Татьяна Канунникова Президентибиз Владимир Путин тюзюнлей эфирни кезиуюнде энчи аскер операциягъа къатышханлагъа эмда аланы юйюрлерине не жаны бла да себеплик этилирге кереклисин энчи чертип айтханын эсгертгенди. Ызы бла къырал башчыны бу сёзлерин юлгюге келтиргенди: «Адам жанына къоркъуу тюшген болумда эсе, ол жууукъларындан сора да, къыралны, власть органланы жанларындан да уллу къайгъырыулукъну сезерге керекди. Ма ол заманда анга борчун толтурургъа бютюн тынчды. Аны себепли аскерчилеге, аланы юйюрлерине кёз-къулакъ болуу бюгюнлюкде федерал, регион, муниципал къуллукълада ишлегенлени баш борчларындан бириди».
- Биз барыбыз да сизге бек къайгъырабыз, юйюрлеригизге, аскер борчугъузну толтуруп, сау-саламат къайтырыгъызны да сакълайбыз, -дегенди Татьяна Канунникова.
Ызы бла «Ата журтну къоруулаучулары» фондну регион бёлюмюню таматасыны орунбасары Заур Бетуганов сёлешгенди. Ол фондну регион бёлюмюню ишини юсюнден къысха билдириу этгенди, ала СВО-да аскер борчларын толтура ёлгенлени юйюрлери бла къаты байламлыкъ жюрютгенлерин, къыркъ алты министерство, ведомство, муниципал къуралыу бла бирге ишлеуню юсюнден келишим этилгенин да айтханды.
- СВО-гъа къатышханланы кеслерине, жууукъларына да консультация болушлукъ дайым да этиледи, ол тохтатыллыкъ тюйюлдю, кеси да кёп тюрлюдю. МФЦ-да алагъа деп энчи жер барды. Регион бёлюмде къыркъ адам ишлейди, ала республиканы битеу муниципал районларында эмда округларында тийишли жумушла бардырадыла. 11 декабрьге дери тергелген эсеплеге кёре, бизге 2040 адам жумушлары бла келгенди. Бирле юридический, психология болушлукъ излеп, башхала санатор-курорт багъыу керек болуп, ючюнчюлери, тийишли удостоверение алыр ючюн», - дегенди ол.
Докладчы айтханыча, фонд дагъыда СВО-ну ветеранларын эмда аланы юйюрлерини адамларын ишге салыу жаны бла да себеплик этеди. Къошакъ усталыкъ алыргъа да себеплик этиледи. Келир жылгъа да кёп иш белгиленнгенди.
Нальчикде иш бла жалчытыу араны бёлюмюню таматасыны орунбасары Аскер Ерижоков энчи аскер операциягъа къатышханла эмда аланы юйюрлерини келечилери къаллай тарыгъыула эмда тилекле бла да келирге боллукъларын, ала не сорууларына да жууапла табарыкъларын ышандыргъанды.
Аскер операциягъа къатышып къайтхан биреуленни юй бийчеси тюбешиуню кезиуюнде медсестраланы курсларын ётерге сюйгенин билдиргенди. Анга алайда окъуна себеплик этерге айтхандыла.
Тюбешиу ачыкъ эмда жарыкъ халда бардырылгъанды. Энчи аскер операциягъа къатышып къайтханла къалай къуллукъ этгенлерин айтхандыла.»Хар бирибиз да,- дегенди аладан бири, - жаралы болуп къайтханыбызгъа да къарамай, энтта да керек болса, Ата журтубузну, къыралыбызны чеклерин къорууларгъа хазырбыз».
«Бизни проектибизге тийишлиликде бу бирге бардырылгъан биринчи тюбешиудю,- дегенди «Единая Россия» битеуроссей политика партияны регион бёлюмюню башчысыны орунбасары Марина Шогенова. - Барыбыз да кёргенибизча, быллай ушакъла керекдиле. Келе тургъан жангы 2024 жылда ала бютюн кёп боллукъларына ышанама».
Холаланы Марзият
