Зи къалэн зыгъэзащIэу хэкIуэда журналистхэм я фэеплъ махуэм, дыгъэгъазэм и 15-м, Урысей гвардием ведомствэм хэмыт и хъумакIуэ къудамэм и лэжьакIуэхэм Iуащхьэмахуэ куейм хыхьэ Терскол жылагъуэм щыгъуэ пэкIу щрагъэ­кIуэкIащ.

Хабзэ зэрыхъуауэ, ар щызэхэтащ жылагъуэм и лъагапIэ­-хэм ящыщ зым щагъэува фэеплъым деж. Абы кърихьэлIащ «Эльбрусские новости» район газетым и редактор нэхъыщ­хьэ Газаевэ Зухра, Урысей гвардием и управленэу КъБР-м щыIэм и офицер, полицэм и подполковник КIэфо Залым, ­республикэм и Iуащхьэмахуэ районым щыIэ хъумакIуэ къу­дамэм и гупыр. 
КIэфо Залым тепсэлъыхьащ фэеплъым зи цIэр тетха, ведомствэм и дзэ журналистхэу, зауэ командировкэхэм къимыкIыжахэу Урысей гвардием и пресс-IуэхущIапIэм и офи­-цер, полковник Постнов Сергейрэ «На боевом посту» жур­налым и корреспондент Ягодин Анатолийрэ я къекIуэкIыкIам. 
- Зи къалэным фIыуэ хэзыщIыкI а офицерхэм я гъащIэр ятащ ди къэралым папщIэ. Дэ тхъумэн, къытщIэхъуэ щIэблэм ядгъэщIэн хуейщ абыхэм я фэеплъыр, - жиIащ КIэфом. 
Газаевэ Зухра къыхигъэщащ фэеплъ махуэм мыхьэнэшхуэ зэриIэр: 
- Дигу къыдогъэкIыж, зи къалэнхэр жылагъуэ псом яфI пылъу, пэжу езыхьэкIахэр. Дэ тщыгъупщэ хъунукъым я IэщIагъэм хуэпэжахэр. 
Къызэхуэсахэр журналист хэкIуэдахэм пщIэ хуащIу да­къикъэкIэ щымри, фэеплъым деж удз гъэгъахэр щагъэтIы­лъащ.
БАХЪСЭН  Азэмэт.