Псыхъурей жылэм дэт сабий садым ­«Къуажэхэм зегъэужьын» къэрал пэхуэ­щIэм хиубыдэу иращIылIэ лэжьыгъэхэр куэд мыщIэу зэфIагъэкIынущ.

1983 гъэм яухуа унэм и унащхьэм, блынхэм, унэлъэгухэм ныкъусаныгъэ щхьэ­хуэ­хэр ягъуэтат, лэжьыгъэ кууи нобэм къэс иращIылIатэкъым. Мы махуэхэм Iуэхур здынэсар къипщытащ щIыналъэ адми­нистрацэм и Iэтащхьэ Балъкъыз Артур. Абы къызэры­хигъэщамкIэ, пэшкIуэцI, унэ­щIыб лэжьыгъэхэр и кIэм нагъэсащ. Ап­хуэдэу егугъуу зыхуей хуагъэзащ инженер хуэIухуэщIэхэр, бжэ-щхьэгъубжэхэр, псыр зрикIуэ бжьамийхэр, шхапIэр, сабий джэгупIэр, унащхьэр. ИлъэсыщIэм ирихьэлIэу лэжьыгъэ псори и кIэм нагъэсынущ.
А къуажэм Къатхъэным и цIэр зезыхьэ и уэрам нэхъыщхьэм километри 6,5-рэ зи кIыхьагъ лъэс зекIуапIэ щаухуащ. Абы ­жы­лэм и теплъэр нэхъри иригъэфIэкIуащ, IуэхущIапIэ щхьэхуэхэм уекIуэлIэнри куэдкIэ нэхъ тынш хъуащ.
Апхуэдэ лэжьыгъэхэр щызэфIагъэкIащ Ислъэмей къуажэм и Надречнэ уэрамымрэ Чыпым и цIэр зезыхьэ уэрамды­хьэмрэ, Хьэ­тIохъущыкъуей жылэм Iэпщэм и цIэр зезы­хьэ уэрамым щыщу километри 2,6-рэ зэ­рагъэпэщыжащ. Бахъсэн щIыналъэм мы илъэсым къриубыдэу зэIузэпэщ щащIащ ­метр зэбгъузэнатIэ мини 2-м нэблагъэ. Лъэс зекIуа­пIэщIэхэр, зыгъэпсэхупIэ щIыпIэхэр къы­щызэIуахащ Бахъсэнёнкэ, Къулъкъужын Ищхъэрэ къуажэхэми. «ГъуэгуфI шына­гъуэн­шэхэр» лъэпкъ пэхуэщIэм хиубыдэу Зеи- къуэ щаухуащ Дыгъэмыхъуэ хьэблэр къэрал гъуэгу нэхъыщхьэм пызыщIэ лъэмыж.

Шэрэдж  Дисэ.