КъБР-м и Iэтащхьэ КIуэкIуэ Казбек Террорым пэщIэтынымкIэ комиссэмрэ Оперативнэ штабымрэ я зэIущIэ иригъэкIуэкIащ.
ЗэIущIэм щытепсэлъыхьащ ИлъэсыщIэмрэ Хъуромэмрэ епха махуэшхуэхэм шынагъуэншагъэр къыщызэгъэпэщын зэрыхуейм.
«Мы гъэм цIыху куэд къызэщIэзыубыдэ дауэдапщэхэр едгъэкIуэкIыну ди мурадкъым, - жиIащ КIуэкIуэ Казбек. - ИтIани, егъэджэныгъэм пыщIа IуэхущIапIэхэми са-бий IыгъыпIэхэми илъэсыщIэ псейм ещIэкIа махуэшхуэ- хэр къыщызэрагъэпэщынущ, театр теплъэгъуэхэр щагъэхьэзырынущ. Абы къыхэкIыу, цIыхухэр щызэтрихьэ щIыпIэхэм шынагъуэншагъэ и лъэныкъуэкIэ яхуэсакъын хуейщ», - къыхигъэщащ КIуэкIуэ Казбек.
«КъинэмыщIауэ, 2024 гъэм и гъатхэпэм УФ-м и Президентыр хахынущ. Ар цIыхушхуэ зыхэтыну Iуэхугъуэщ, екIурэ-ещхьу къызэгъэпэщын хуейуэ», - къыдыщIигъуащ щIыналъэм и УнафэщIым.
А псом ипкъ иткIэ, КIуэкIуэ Казбек Террорым пэщIэтынымкIэ комиссэм, Оперативнэ штабым, республикэм и гъэзэщIакIуэ IуэхущIапIэхэмрэ муниципальнэ администрацэхэм я лэжьакIуэхэмрэ къалэн ящищIащ хэхыныгъэм и пэ къихуэ зэманым шынагъуэншагъэр ягъэнэхъэпэну, IэIэт щекIуэкIыну щIыпIэхэм щIэпхъаджагъэ къызэрыщымыхъуным хуэсакъыну, цIыхубэм зыхуейр хахынымкIэ я хуитыныгъэр яхъумэну.
ЗэIущIэм къыщапщытэ-жащ Терроризмэм пэщIэтынымкIэ комиссэм 2023 гъэм КъБР-м щригъэкIуэкIа лэжьыгъэр, абы епха къэрал программэр республикэм щагъэзэщIэху, 2021 - 2023 гъэхэм зэфIаха Iуэхухэмрэ абыхэм ятекIуэда мылъкумрэ.
Республикэм и Iэтащхьэм къыхигъэщащ 2024 гъэм лэжьыгъэшхуэ къазэрыпэщылъыр, щIэпхъаджагъэ къамыгъэхъун папщIэ, къарууэ щыIэр къызэрагъэсэбэпыпхъэр.
ИкIэщIыпэкIэ ягъэзэщIапхъэ Iуэхухэм ящыщу къалъытащ политикэ и лъэныкъуэ- кIэ мыхьэнэшхуэ зиIэ зэIущIэхэр шынагъуэншэу къызэгъэпэщын зэрыхуейр, псом хуэмыдэу махуэшхуэхэр, щэнхабзэмрэ спортымрэ епхахэр. Гулъытэ нэхъыбэ яхуэфащэщ Президентым и хэхыныгъэм егъэщIылIа Iуэхугъуэхэм.