Къабарты-Малкъарда «Муратланы назы тереги» битеуроссей жандауурлукъ акция башланнганды. Анга республиканы Правительствосуну Председатели Мусукланы Алий, толтуруучу власть органланы бла муниципалитетлени администрацияларыны таматалары къатышхандыла.

«Муратланы назы тереги» битеукъырал акция 2018 жылдан бери ётдюрюледи, жыл сайын аны Росмолодёжь бла Волонтёр араланы ассоциациясы къурайдыла, быйыл а алагъа «Биринчилени къымылдаулары» да къошулгъанды. Акцияны мураты къыйын жашау болумгъа тюшген балаланы, чекленнген онглары болгъан эм ёксюз сабийлени Жангы жылны байрамыны аллында къууандырыуду, кёллерин кётюрюудю. 
Бюгюнлюкде регионну социал учрежденияларында бла интернат-юйлеринде сабийлени бир мингден аслам мураты жыйышдырылгъандыла. Аладан сора да, бу жол акциягъа Россейни жангы регионларында социал учрежденияладан сабийле да къатышхандыла. Дагъыда бир жангычылыкъ – быйыл хар сюйген сабийни муратын толтураллыкъды, аны ючюн «Муратланы назы тереги» онлайн-платформада да бардырылады. Инсан, акцияны сайтына кирип, кеси жаратхан муратны сайлап, аны толтурургъа эркинди. Аллай онгу жокъ эсе уа, ахчаны къояргъа боллукъду, артда волонтёрла аны аты бла сабийге сюйгенин алып берликдиле. 
Къабарты-Малкъарда 2023 жылда жандауурлукъ акциягъа толтуруучу власть органланы, къырал учрежденияланы, билим бериу организацияланы, коммерциялы секторну келечилери эм гитчелени къаууандырыргъа сюйген хар адам да къатышаллыкъдыла.

Кульчаланы Зульфия 
хазырлагъанды.