Быйыл Къабарты-Малкъарны курортларына бир миллион бла эки жюз минг адам келип  солугъандыла, саулукъларын игилендиргендиле. Бу тарих ёсюп барлыгъы кимге да баямды, аны себепли туристлени къоркъуусузлукъларына аслам эс бёлюнеди: Россейни МЧС-ини ишчилери усталыкъларын ёсдюредиле, жараула бардырадыла.

 Жарсыугъа, кёпле Минги тауну тёппесине чыгъаргъа сюйгенликге, анга хазырланмайдыла, аны хатасындан кёп тюрлю палахлагъа тюшедиле. Аллайлагъа мычымай болушлукъ этген усталагъа.  кеслерин да сакълап, башхаланы къыйынлыкъдан къутхарыр ючюн, кишилик, билим да керекдиле.

Бу кюнледе къутхарыучула  Минги тауда тёртминглик бийикликде къар юзюлгенде  этерик ишлерин жарау халда къайтаргъандыла. Къар юзюлсе,  аны тюбюнде туристле тюшерге да боладыла. Къутхарыучула аланы,  биперлени хайырланып, къалай къутхарлыкъларын жараулада кёргюзтгендиле. Дагъыда жаралы болгъанланы «Акья» чанала  бла энишге къалай тюшюрлюклерин туура этгендиле.

 Солургъа келген  бир-бир лыжачыла, белгиленнген къоркъуусуз жолладан чыгъып, къар ырхыланы сылтаулары боладыла. Ала жаланда кеслерини жашауларын къоркъуугъа салгъанлары бла чекленмей, башхаланы да жояргъа боладыла. Тауланы  дуниясы ариуду, алай аны ангыларгъа, билирге керекди, ары барырдан алгъа тынгылы хазырланыу болмаса, ол кёрюнюп къалады.

«Минги тауну тийресинде солугъанла барысы да бирча  жууаплыла тюйюлдюле. Бусагъатда къар юзюлюулени  тюбюне тюшгенлени къысха заманны ичинде къутхарыу амалланы жангыдан къайтаргъанбыз, быллай жараула ишибизде бек болушадыла», - дегенди Элбрус бийик-тау излеу-къутхарыу  отрядны башчысы Гюлюйланы Абдуллах. Битеуда жараулагъа отрядны эм «Минги тау» курортну онеки къутхарыучусу  къатышханды.

Байсыланы Марзият.