КъМР-ни Башчысы Казбек Коков Россей Федерацияны Президентини Шимал-Кавказ федерал округда толу эркинликли келечисинде Советни жыйылыууна къатышханды, деп билдиргендиле КъМР-ни Башчысыны бла Правительствосуну пресс-службасындан.
Кенгешни полпред Юрий Чайка бардыргъанды. Миллет проектле къалай толтурулгъанларыны юсюнден айта, ол иш, саулай алгъанда, иги баргъанын чертгенди. СКФО-да аны бла байламлы жумушла орта эсеп бла 95,5 процентге толгъандыла. Аны бла бирге къырал башчыны келечиси кемчиликлени юслеринден да сагъынмай къоймагъанды. Миллет проектлени толтуруу Президентибиз Владимир Владимирович Путин салгъан миллет борчланы тамамлауну баш амалларындан бири болгъанын чертгенди.
Къабарты-Малкъарда миллет проектлеге кёре 45 регион проект жашауда бардырылады. Аланы битеу багъалары 12 миллиард сомдан асламдыла. Ол ахчаны 9,8 миллиарды федерал бюджетден бёлюннгенди. Биринчи декабрьге миллет проектле бла байламлы жумушла 99,7 процентге толтурулгъандыла. Республика ол жаны бла къыралны регионларыны тизмесинде 11-чи жердеди.
Артыкъда магъаналы объектлени эсигизге салайыкъ: 10249 окъуу жери болгъан 18 школну, спорт мекямланы къурулушлары, школлагъа бла школлада спорт заллагъа, маданият учреждениялагъа да тынгылы ремонт этиу, суу бла жалчытыучу 16 объектни ишлеу, 110 арбазны бла 47 жамауат тийрени тапландырыу. Дагъыда 100 километрден артыкъ регион неда муниципалла аралы жолланы 33 кесегин жангыртыу. Саулукъ сакълауда уа – онкодиспансерни, 3 амбулаторияланы, ФАП-ны къурулушларын бардырыу, 14 поликлиника бёлюмге тынгылы ремонт этиу.
Биринчи медицина болушлукъ берген бёлюмге транспортдан 19-су, оборудованиядан да 140-дан артыгъы алыннгандыла. Ала барысы да ишлеп турадыла.