КъМР-ни Башчысы Казбек Коков «Кавказ» Р-217 автомобиль жолну 429-чу километринде Бахсан сууда кёпюрню тынгылы ремонтдан сора ачылыууна къатышханды.
Ол къууанчлы ишге келгенлени Росавтодорну башчысы Роман Новиков видео амал бла алгъышлагъанды.
- Федерал жол агентство РФ-ни Транспорт министерствосуну буйругъу бла тёрт ызлыкълы жолланы санын кёбейтиу ишни андан ары бардырады. Россейни шимал эмда къыбыла жанларын бирге къошхан ызны эмда Шимал Кавказны автомобиль жолларыны баш кесегине саналгъан «Кавказ» федерал автомобиль жол а энчи магъананы тутады. Къабарты-Малкъар Республиканы тийреси бла автомобиль жолланы 100 километрден асламы ётеди – Ставрополь крайны чеклеринден башлап Шимал Осетия-Аланияны чеклерине дери. Ол жолну 70 километри энди тёрт ызлыкълыды. Ол а бек магъаналыды, артыкъда Президентни буйрукъларын толтурургъа кереклисин эсге алгъанда. Ала алжаусуз тамамланнганларыны юлгюсюне ма бу кёпюрню санаргъа боллукъду. Биз аны бла тохтарыкъ тюйюлбюз, алыкъа бек аздан 35 километрге тынгылы ремонт этерге эмда 4 ызлыкъгъа дери кенгертирге тюшерикди,- дегенди Роман Новиков.
Ол дагъыда Къабарты-Малкъар «Къоркъуусуз эмда тынгылы жолла» миллет проектни толтуруу жаны бла алчыланы санында болгъанын эсгертгенди. «Быйыл сиз битеу жол ишлени биринчилени санында бошагъансыз»,- деп чертгенди.
Республика Россейни Транспорт министерствосуну саугъасы бла да белгиленнгенди. «Кавказ» жол управленияны башчысы Александр Лукашук Казбек Коковха дипломну бла «Золотой каток» таш суратны бергенди.
Къууанчлагъа КъМР-ни Правительствосуну Председатели Мусукланы Алий, муниципалитетлени жер-жерли самоуправление органларыны, тийишли предприятияланы бла жамауатны келечилери да къатышхандыла.
Кёпюрню тиынгылы жангыртыу ишле 2022 жылны июль айында башланнган эдиле. Жолчула жангы эмда къыйматлы амалла бла бек уллу иш тындыргъандыла. Александр Лукашук бу жол бла жюрюген автомобильлени саны арт жыллада иги кесек ёсгенин, суткагъа 35 мингнге жетгенин, 122-метрлик кёпюр эки ызлыкълыдан тёрт ызлыкълы болгъанын чертгенди. Ол бузламазча да мадар этилгенди: керек заманда адам къолу жетмей, датчикле эритиучю затланы чачарыкъдыла.
Бюгюнлюкде Аргуданны къыйырындан башлап Шимал Осетияны чеклерине дери элтген жол жангыртыла турады, Эски черекге кирген жерде кёпюрге да ремонт этиледи. Келир жыл а Куба-Таба элни тийресиндеги кёпюрге эмда Бахсан-Къызбурун регион жолну юсю бла ётген ызгъа тынгылы ремонт этилликди.
Казбек Коков, алгъышлау сёзюнде, республиканы жамауатыны атындан Россейни Президентине миллет проектлени, ол санда «Къоркъуусуз эмда тынгылы жолла» проектни да, толтуруу жаны бла башламчылыкълары ючюн жюрек ыразылыгъын билдиргенди.
-Жолла эмда транспорт инфраструктура бла байламлы тюрлениулени хар адам да сезеди. Регионубузгъа уллу эс бургъаны эмда къайгъыргъаны ючюн, Марат Шакирзяновичге, Росавтодорну бла «Кавказ» жол управленияны битеу коллективине сау болугъуз дейбиз. Алгъын берилген сёзге ала кертичи болгъандыла, ишлерин тийишли даражада эмда къысха заманны ичинде толтурадыла. Аны магъанасы уа бек уллуду – кёп адамны ёлюмден сакъларгъа онг чыгъады, туристлеге, республикада ары бла бери жюрюген адамлагъа да ырахат болумла къураладыла, экономиканы айныууна да себеплик этиледи. Ма аллай магъаналы жумушну толтургъанлагъа уллу ыспас этерчады, - деп чертгенди КъМР-ни Башчысы.
Казбек Коков «Упрдор «Кавказ» федерал казна биригиуню таматасы Александр Лукашук бла бирге жолчулагъа къырал эмда ведомстволу саугъаланы бергенди, деп билдиргендиле КъМР-ни Башчысыны бла Правительствосуну пресс-службасындан.
