Къабарты-Малкъар гуманитар-техника колледжде «Профессионалитет» федерал проектни чеклеринде ачыкъ эшиклени  кюню болгъанды. Бу жумушха окъуучула, башха колледжлени студентлери, аланы аталары-аналары, тюзюнлей къараргъа сюйген адамла да къатышхандыла. Программада экскурсияла, иш бла жалчытхан организацияланы келечилери бла тюбешиуле  да болгъандыла.

Ол кюн анда кёп магъаналы мастер-классла ётгендиле. Аланы санында «Призвание» медицина колледжни окъуучулары адамланы саулугъуна жараулу кёп магъаналы затла кёргюзтгендиле. Жолда къыйналгъаннга къаллай болушлукъ этерге боллугъун, жюреги тохтамазча солуу къалай алдырыргъа кереклисин, сабий къарылса, не мадар этерге кереклисин манекенлени  юслеринде кёргюзтгендиле.

Дагъыда анда Информация технология бла программированияны, сеть эм система администрированияны, минчакъла бла эшиуню, гитче класслада окъутууну юсюнден мастер-классла бардыргъандыла. Аны бла чекленмей, школгъа дери билим бериу планетарийни ишин кёрюрге, юзмезде суратла этген искусство бла эм робототехника бла шагъырейленирге онг болгъанды.

- Бу жумуш бюгюн битеу Россейде бардырылады. Къыралда орта профессионал билим берген учрежденияла юч мингден аслам боладыла, бу федерал эришиуню финалына жюз отузу ётгендиле. КъМР-де ол проектде хорлагъан а бизни колледж болгъанды, бу жумуш мында бардырылгъаны да аны бла байламлыды. Бюгюн мында орта профессионал билим берген махкемеледен жаш адамла  асламдыла. Аланы хар бири да кесини майданында окъууларында къаллай сейир затлагъа юйреннгенлерин айтадыла. Ол а келген ата-аналагъа мындан ары сабийлерине къыйналмай керекли окъууну сайларгъа иги амалды,- дегенди колледжни директору Барасби Абазов.

Огъарыда сагъынылгъаныча, анда ол кюн, студентледен сора да, школчуланы ишлери бла танышдыргъандыла. Аланы санында Нальчикни тёртюнчю номерли гимназиясыны сохталары болгъандыла. Ол мектепде 2021 жылдан бери «Шёндюгюлю школ» деген программаны чеклеринде «Кванториум» сабий технопарк ишин бардырады.

  Устаз Оксана Керефова сабийлеге биринчи классдан башлап окъургъа амал болгъанын айтханды. Анда инсан къайсы вузгъа барыргъа сюйгенине да эс бёледиле, къыйналмай окъуугъа кирирге да болушадыла. Дагъыда окъуучуну къаллай илмугъа итиниую болгъанына уллу эс бурадыла эм ол жаны бла амалла къурайдыла. Гитчеле кёп тюрлю эришиулеге къатышып, кеслерин сынаргъа амаллары болгъанын да айтханды ол.

Алгъаракълада сегизинчи классны окъуучусу Рустам Гусулаев «Умный город» деген проекти бла битеуроссей конкурсда алчы болгъанды. Ишин жаратып, аны Къырал Думагъа чакъырып алгъышлагъандыла. Фахмулу жашчыкъ колледжде да келгенлени проекти бла шагъырейлендиргенди. Робототехника илмуну хайыры бла саулай шахарыны юлгюсюн да этгенди. Анда троллейбус айланады, жел тирменни хайыры бла чыракъ жанады, саулукъгъа заран келтирмеген машинала жюрюйдюле. Ол «шахарда» хар зат да адамны саулугъуна, табийгъатха заран келтирмезча ишленипди. Троллейбус а телефонда программаны себеплиги бла керекли маршрутда айланады.

 Дагъыда хунерли сабийле кюн батарейлени болушлукълукълары бла адамлагъа харкюнлюк жашауда жараулу къаллай затла этгенлерин кёргюзтгендиле. «Адамны саулугъуна керекли кюбюрчек» да болгъанды, ол аппаратны хайыры бла врачлагъа бармагъанлай, инсанны кеси аллына саулугъуна къараргъа, тюрлениулени эслерге онгу болады. Дагъыда къурулушда хайыр келтирген, уллу отну ёчюлтген, ауур затланы кётюралгъан машиналаны проектлерин да къоруулагъандыла. Тогъузунчу классны окъуучулары Огъурлуланы Милананы бла Ульяна Чавдарьны проектлерин да энчи белгилерчады. Ала аппарт бла эм компьютерде программа бла къайсы азыкъ къаллай хайыр неда заран келтиргенин ачыкълагъандыла. Пробиркалада чипсы, газы болгъан татлы суу, таза суу да бар эди. Аппаратны пробиркагъа къошсала, ол аны хатасы къаллай бир болгъанын кёргюзтеди, адамны къанында бал тузун кётюртюп, саулукъгъа заран салгъанын баям этгенди. Аны ючюн къызла, татлы суулагъа, чипсылеге алданмагъанлай, таза суу ичерге чакъыргъандыла.

Андан сора колледжни директору Барасби Абазов бла КъМР-ни жарыкъландырыу эм илму министрини орунбарасы Мокъаланы Ачемез, ата-анала бла тюбеп, проектлени юслеринден айтхандыла, аланы сорууларына да жууапла бергендиле.

Темуккуланы Амина.