Телефон бла сёлешген хыйлачыла адамланы неда этип алдатыргъа кюрешедиле. Специалистле ала къаллай амалланы хайырланыучуларыны юсюнден айтадыла.

Бюгюнлюкде аманлыкъчыла бизни телефон номерлерибизни кёп техникалы амалла бла билирге боллукъдула. Алай болса, алагъа банк номерлерибиз да ачыкъ боладыла. Ала къайсы бирибизге да атыбызны, тукъумубузну айтып сёлашаллыкъдыла, карталарыбызны номерлерин, ала не заманнга дери хайырланыуда болгъанларын да билликдиле. Хыйлачыла информациялы араны тауушун къошуп да сёлешедиле. Алай бла биз алагъа ышанырча этедиле.

Адам кече ортасында неда эрттенликде терк эс жыялмагъанын билип, бу заманлада сёлеширге да угъай демейдиле. Сёз ючюн, бизни картабызны ким эсе да хайырланады деп къоркъутадыла. Аны номерин жиберигиз деп къысадыла. Алай болса, биринчиден, сёлешгенни атын, тукъумун, къайсы банкны бёлюмюнде ишлегенин соругъуз. Ызы бла кечирек сёлеширбиз деп, телефонну салыгъыз, кесигиз а ол айтхан банкга сёлешигиз.

Карточканы юсюнде банкны тюзюнлей номери жазылып болады. Белгисиз номерлеге сёлешмегиз, смс-билдириуле да жибермегиз. Финанс учрежденияны эм аны бёлюмлерини жаланда официальный номерлерин хайырланыгъыз!

Дагъыда терк оноу этерге ашыкъмагъыз. Банкда сизни картагъыз бла хыйлачы кюрешгенин эслеселе, аны бла операцияла эки кюннге тохтатыладыла. Ол кезиуде учреждениягъа кеси оноуубузну билдирирге керекбиз.

Къайтарып эсгертейик: банк карталаны номерлерин бир кишиге билдирирге жарамайды.

Улбашланы Мурат хазырлагъанды.