Къэбэрдей-Балъкъэрым и къалэхэмрэ жылагъуэхэмрэ зегъэужьынымрэ цIыху­хэм я псэукIэр егъэфIэкIуэнымрэ хуэгъэпса къэрал пэхуэщIэхэм хиубыдэу гъэм и кIыхьагъкIэ ди щIыналъэхэм лэжьыгъэшхуэхэр щызэфIагъэкIащ.

Абыхэм ящыщ зыщ зи щIыуэпсыр къаб­-зэ Булунгу бгырыс къуажэм къыщызэIуаха турист лагерыр. «Туризмэмрэ гъэхьэщIэ­кIэмрэ» къэрал пэхуэщIэм ипкъ иту яухуа глэмпингым и унэхэр пхъэ быдэм къыхэ­щIыкIащ, къуажэм и щIыуэпс зэхэлъыкIэм сыт и лъэныкъуэкIи дахэу хэзагъэу. Ахэр ­яIыгъщ сыткIи шынагъуэншэ, щIым быдэу хэгъэжыхьа гъущI лъакъуэхэм. ИтIанэ, тыншу хэлъращи, апхуэдэ унэхэр, ущыхуейм щIэх дыдэу зэпкърыпхыу, нэгъуэщI щIы­пIэхэм бгъэIэпхъуэ мэхъу. ЩэкI быдэ дыдэм къыхэщIыкIа а хьэщIэщхэм я бжэхэм IункIыбзэ иратыркъым - молниехэр драгъэжейри, абыкIэ зэфIокI. Ахэр иджырей мардэхэм тету къызэгъэпэщащ къабзапIэ-зыгъэпс­кIы­пIэхэмкIэ, зыгъэпсэхупIэ тыншхэмкIэ. Зи гугъу тщIа пэхуэщIэм и зы Iыхьэу щыт апхуэдэ ухуэныгъэхэр иджыпсту къэралым ядиIыгъщ. Аращ ахэр ухуэнымкIэ жэрдэмыр къыхэзылъхьа, Хьэсэней жылэм щыщ Гаев Рауль иубла Iуэхур къыщызыгъэпсынщIари - къуажэдэсхэм къыдаIыгъа Iуэхур нэхъ псын­щIэу зэфIэкIащ Къэбэрдей-Балъкъэрым ТуризмэмкIэ и министерствэм къыхуигъэфэща грантым и фIыгъэкIэ. 
Шэджэм аузыр сыт щыгъуи хабжэу щытащ ди республикэм и зыплъыхьыпIэ нэхъ ­дахэхэм. Абы къыхэкIыу турист куэд щы­-зэблэкIырт. Совет лъэхъэнэм мыбы зы­гъэпсэху­пIэ нэхъыфIхэм щыщу тIу щыIащ. Мы зэманым иужь ихьащ абыхэм я зэ­фIэгъэувэ­жыным: асфальт гъуэгу щащI, ад­­ми­нистративнэ унэхэр щаухуэ, абыхэм я ­Iэгъуэблагъэхэр зэIузэпэщ ящI. Лагерым и япэ хьэщIэхэр иригъэблэгъэнущ 2024 гъэм        и накъыгъэ мазэм.

Жанхъуэт   Зузэ.