Къабарты-Малкъарда «Мени бизнесим» арада предпринимательле бла тюбешиу бардыргъандыла кёп болмай. Анга «Мени халал бизнесим - 2023» деген Битеуроссей конкурсну регионда кезиуюнде хорлагъанланы чакъыргъан эдиле. Тюбешиуде ол конкурсну эсеплерини, социал бизнесни эмда республикада предпринимательлеге къырал не бла билеклик этгенини юсюнден хапарлагъандыла, деп билдиргендиле Арадан.

Бу конкурсну гитче эмда орта предпринимательстволада эм иги проектлени излерге эмда ачыкъларгъа деп къурагъандыла. Ала кеслери да ишлерин социал жаны бла бардыргъанла болургъа керекдиле. Дагъыда жамауатха хайырлы умутланы толтурургъа, адамланы жашау болумларын игилендирирге, аланы иш бла жалчытыргъа, сакъатлагъа билеклик этерге, абаданлагъа эмда къыйын жашау болумлагъа тюшген инсанлагъа себеплик этерге итинирге.

Конкурс ол жаны бла эм иги болгъан, кеслери да социал чурумланы тамамлагъан проектлени ачыкълагъанды.

Эсигизге салайыкъ, быйыл эришиуледе онюч инсан хорлагъанды. Аланы проектлери билим бериу, маданият, социал туризм эмда иш бла жалчытыу бла байламлы эдиле.

Омарланы Мурат хазырлагъанды.