Бахъсэн щIыналъэм и «Джэдыкъуэ Плъыжь» комплексым иджыблагъэ щекIуэкIащ гъуэгуанэ кIыхь шым тесу зэпычынымкIэ зэхьэзэхуэ. Ар теухуауэ щытащ Аникеев Сергей и фэеплъ саугъэтыр къэхьыным. Абы хэтащ Къэбэрдей-Балъкъэрым нэмыщI, Къэрэшей-Шэрджэсым, Адыгейм, Дагъыстэным, Мэзкуу, Липецк, Пензэ областхэм, Ставрополь, Краснодар крайхэм я шууейхэр.
Километри 100 зи кIыхьагъ гъуэгуанэр зэпычыным япэ увыпIэр къыщихьащ Мэзкуу областым щыщ Ковшаровэ Анастасие (Эхо де Монтпаон шымкIэ), етIуанэ хъуащ ди республикэм и шууей Зыхъуэ Замир (Азарт), ещанэр Жамбей Сэлимщ (Гектор, КъБР).
Километр 80-м япэ щыхъуащ КIэбышэ Анзор (Гильзар, КъБР), етIуанэр Къунаш Алимбэчщ (Нарадная, КъБР), Тау Аслъэнбэч ещанэщ (Рабдан, КъБР).
Километр 40 къэзыкIуахэм я деж щытекIуащ Абдуллаевэ Салихьэ (Аль-Шамс, КъБР), Гусак Елизаветэ етIуанэщ (Убых, КъБР), Тембот Динэ ещанэщ (Глок, Адыгей).
Зэхьэзэхуэм къыщыхэжаныкIахэр щIыхь тхылъхэмкIэ, кубокхэмкIэ, медалхэмкIэ ягъэпажащ.
«Аникеев Сергей шы лъэпкъыфI къэзыгъэхъу цIыху телъыджэу щытащ. Краснодар крайм щыIэ «АдыгэшымкIэ Аникеевым и шы завод» IуэхущIапIэм и унафэщIу, къэралым шы лъэпкъыфIхэр къыщызыгъэхъухэмрэ адыгэшыр фIыуэ зылъагъухэмрэ я зэгухьэныгъэм и тхьэмадэу лэжьащ. И къару, щIэныгъэ, гуащIэ куэд хилъхьащ адыгэшыр гъэбэгъуэным, абы и пщIэр дунейм лъагэу щыIэтыным. А цIыху гуащIафIэр дэ зэи тщыгъупщэнукъым», - яжриIащ къызэхуэсахэм Бахъсэн къалэм и администрацэм и унафэщI Мамхэгъ Хьэчим.
НАУРЫЗЫКЪУЭ Ислъам.