УФ-м «Лъэпкъ политикэр щыпхыгъэкIын», Адыгэ Республикэм «Лъэпкъхэм я зэхуаку дэлъ зэхущытыкIэхэр егъэфIэкIуэнымрэ хэкупсэ гъэсэныгъэ ябгъэдэлъхьэнымкIэ» къэрал программэхэм тету, ди къуэшхэм я хэгъэгум иджыблагъэ щекIуэкIащ «Адыгэ щэнхабзэм и махуэ» зыфIаща дауэдапщэхэр. Ар къызэзыгъэпэщар Адыгейм Лъэпкъ IуэхухэмкIэ, нэгъуэщI къэралхэм щыпсэу хэкуэгъухэм запыщIэнымрэ хъыбарегъащIэ IэнатIэхэм ядэлэжьэнымкIэ и комитетырщ.
Республикэм илъэс ещанэ хъуауэ къыщызэрагъэпэщ адыгэхэмрэ урысхэмрэ я щэнхабзэм теухуа мыпхуэдэ Iуэхугъуэхэр. Иджырейри абыхэм ящыщ зыщ. АтIэми, ахэр щIыналъэм зэрыщрагъэкIуэкIыр УФ-м Лъэпкъ IуэхухэмкIэ и федеральнэ агентствэм и дэIэпыкъуныгъэкIэщ.
КъызэгъэпэщакIуэхэм зэрыжаIэмкIэ, щэнхабзэм теухуа мыпхуэдэ зэхыхьэхэр щхьэпэщ Урысейм ипщэ лъэныкъуэмкIэ щиIэ и щIыналъэхэм щыпсэу лъэпкъхэм я зэхуаку дэлъ зэхущытыкIэхэр егъэфIэкIуэнымкIи гъуазджэм зегъэужьынымкIи. КъинэмыщIауэ, ахэр щIэгъэкъуэныфIщ къэрал абрагъуэм лъэпкъыбэу исым я бзэхэм заужьынымкIи хабзэ-бзыпхъэу зэрахьэхэр гъунэгъу щIыналъэхэм щыпсэухэм къегъэцIыхунымкIи.
Адыгэ Республикэм и къалащхьэ Мейкъуапэ а махуэхэм щызэрихьэлIат УФ-м и Ипщэ, Кавказ Ищхъэрэ федеральнэ щIыналъэхэм хыхьэ хэгъэгухэм я лIыкIуэхэу 40-м щIигъу. Ахэр нэхъыбэу Къэбэрдей-Балъкъэрым, Къэрэшей-Шэрджэсым, Краснодар, Ставрополь крайхэм, Ростов областым, хы ФIыцIэ Iуфэ Шапсыгъым, Осетие Ищхъэрэ - Аланием щыIэ лъэпкъ жылагъуэ зэгухьэныгъэхэмрэ я лIыкIуэхэмрэ къэрал къулыкъущIэхэмрэт, хъыбарегъащIэ IэнатIэхэм я лэжьакIуэхэри хэту.
Лъэпкъ музейм
«Адыгэ щэнхабзэм и махуэ» зыфIащам хыхьэу, хьэщIэхэри бысымхэри куэду нэхъ щызэрихьэлIа Iуэхугъуэ нэхъыщхьэхэм ящыщу дэ къэтлъытар хэгъэгум и къалащхьэ Мейкъуапэ дэт Лъэпкъ музейм щекIуэкIарщ.
ХьэщIэхэр зи гугъу тщIы унэ зыкъизыхым дашэри, тхыдэм ижь зыщIихуауэ абы щахъумэ хьэпшып телъыджэхэр щыдагъэлъэгъуащ, дэтхэнэри зищIысым гъэхуарэ удэзыхьэу щыгъуазэ дыщыхуащIу. БлэкIам и Iэужь Iэщэ-фащэхэмрэ унэлъащIэхэмрэ «къыжраIэ» фIэкIа умыщIэну, музейм и лэжьакIуэ нэхъыжьым лъэщу гъэпсарэ дригъэхъуапсэу адыгэхэм я псэукIам, лIэщIыгъуэу къызэранэкIам, дуней тетыкIэу яIам теухуауэ гъэщIэгъуэн куэд зэхыдигъэхащ.
Иужьым, гупым хэтхэр а IуэхущIапIэм и пщIантIэм дэт «ХьэщIэщым» дашэри, нэхъыжьхэмрэ лIыщхьэхэмрэ Iэнэ кIыхьым пэрысу, мыдрейхэр я щIыбагъ дыдэдэсу, «Адыгагъэ зыхэлъым – цIыхугъи хэлъщ» псэлъафэр зи гъуазэ, «Лъэпкъым къыдекIуэкI хабзэхэр – адыгэ щэнхабзэм и къулеигъэщ» («Национальные традиции - богатство адыгской культуры») зыфIаща зэIущIэм щIрагъэдзащ.
Адыгэ щэнхабзэм и махуэм хуаIэ еплъыкIэм ехьэлIауэ зэхыхьэм къыщыпсэлъащ бысымхэм ящыщу а Iуэхум хуэгъэза лэжьыгъэр, махуэ къэс жыхуаIэм хуэдэу, езыгъэкIуэкIхэмрэ хьэщIэхэм ящыщу къызэхуэсахэм ядэгуэшэну гупыж зыщIахэмрэ.
- А щIыкIэм тету дэ цIыхухэр щыгъуазэ дощI лъэпкъыбэ Адыгейм щэнхабзэм зыщегъэужьынымкIэ длэжь лэжьыгъэр зыхуэдэм. Къыхэгъэщыпхъэщ, зы илъэс къэмынэу республикэм и къалащхьэмрэ районхэмрэ щэнхабзэмрэ гъуазджэмкIэ, цIыкIуми нэхъ зыубгъуами, Iуэхугъуэу 70-м щIигъу зэрыщедгъэкIуэкIри. Абыхэм, псори зэхэту, цIыху мин 60-м нэблагъэ зэхуашэс, - къыхигъэщащ «ХьэщIэщым» щекIуэкIа зэIущIэм хэта, Адыгэ Республикэм щэнхабзэмкIэ и министр Аулъэ Юрий.
Зэхуэсым бысымхэмрэ гъунэгъу щIыналъэхэм къикIахэмрэ къинэмыщIа, Адыгэ Республикэм и къалащхьэм къыкIэлъыкIуэ махуэм щекIуэкIа, «Русский мир» зыфIаща зэIущIэм зыкърезыгъэхьэлIахэри къыщыпсэлъащ. Абыхэм ящыщ зыт БРИКС зэгухьэныгъэм и Iуэхугъэув (деловой) гупым (советым) и унафэщI, Бразилием щыщ, илъэс зыбжанэ хъуауэ ди къэралым и щыхьэрым щыпсэу икIи щылажьэ, профессор Барриентос Висенте.
- Мыбдежым щIэсхэм, бысымхэми хьэщIэхэми, чэнджэщ фызот лъэпкъ щэнхабзэхэм теухуа Iуэхухэм адэкIи нэхъри нэхъ ерыщыжу зевгъэужьыну. НэгъуэщI щэнхабзэм щIапIыкIа, хамэ хэгъэгу къыщыхъуа сэ нобэ слъэгъуа-зэхэсхамкIэ срикъуауэ шэсыпIэ сихьэфынущ, Адыгейм и къэфакIуэ-уэрэд жыIакIуэхэр БРИКС-м хыхьэ адрей къэралхэми зэрызыкъыщагъэлъэгъуэфынымкIэ. Езыгъэблэгъэнухэми ягу зэрырихьынум шэч къытесхьэркъым, - жиIащ профессорым.
Пушкин Александр
и уардэунэм
А махуэ дыдэм, сыхьэт 14-м щыщIэдзауэ, Пушкин Александр и цIэр зезыхьэ уардэунэу а къалэм дэтым Адыгэ щэнхабзэм и махуэм хуэгъэза къыкIэлъыкIуэ Iуэхухэм щыпащащ. Адыгэ IэпэIэсэхэм я IэдакъэщIэкIхэр щагъэлъагъуэ утыкушхуэ къыщызэIуахащ, тхыдэдж-тхыдэтххэр, бзэщIэныгъэлIхэр, археологхэр хьэщIэхэм яIущIащ, я упщIэхэм жэуап иратащ, флэшмоб щызэхашащ, хэгъэгум шхыныгъуэу щаупщэфIхэм, Iуагъаплъэ къудей мыхъуу, къызэхуэсахэм Iуагъэхуащ, а псом яужькIэ республикэм и къэфакIуэ, уэрэджыIакIуэ цIэрыIуэхэм концертышхуэ ятащ.
Иужьрейр и щIэдзэкIэкIи и егъэкIуэкIыкIэкIи апхуэдизу удэзыхьэхти, «псоми езгъэлъэгъуарэт мы дахагъэр» жыуигъэIэт! СыхьэтитIым къриубыдэу, къафэрэ джэгукIэ, уэрэдрэ ежьукIэ «яузэда» теплъэгъуэ дахэхэмкIэ къызэщIрагъэубыдэн яхузэфIэкIащ адыгэхэм я щэнхабзэм и мызакъуэу, и тхыдэм щыщ напэкIуэцIхэри. КъинэмыщIауэ, лъэпкъ Iэмэпсымэхэм кърагъэкI пшыналъэ дахэхэр зыщIэт уэрэдхэр адыгэбзэм и диалектитымкIи щызэхыдагъэхащ…
Еудых Iэсият и «ГъэтIылъыпIэ»
Адыгэ щэнхабзэм и махуэм ехьэлIа кIэлъыкIуэ Iуэхугъуэу щытащ дыщэм зэрелэжь щIыкIэмкIэ бзылъхугъэ Iэзащэ, и IэдакъэщIэкI телъыджащэхэмкIэ щIыпIэ куэдым къыщацIыхуа Еудых Iэсият «ГъэтIылъыпIэ» зыфIаща и Унэу Мейкъуапэ дэтым зэрызыщыдагъэплъыхьар. (Ар тхыгъэ щхьэхуэ зыхуэфащэщи, иужькIэ къытезгъэзэжынущ).
Махуэм и кIыхьагъкIэ дызыхэта Iуэхухэм я кIэухт пщыхьэщхьэм тхуаухуа Iэнэм деж хьэщIэхэри бысымхэри дызэрыщрихьэлIэжар. Тлъэгъуар къызэрытщыхъуам дытепсэлъыхьыжу дыздэщысым, республикэм Лъэпкъ IуэхухэмкIэ, нэгъуэщI къэралхэм щыпсэу хэкуэгъухэм запыщIэнымрэ хъыбарегъащIэ IэнатIэхэм ядэлэжьэнымкIэ и комитетым и Iэтащхьэ Щхьэлахъуэ Аскэр жиIащ:
- Лъэпкъхэм я щэнхабзэхэм хэчыхьауэ хухэтх махуэхэр гъэлъэпIэн зэрыщIэддзэрэ куэд щIакъым. Къызэретхьэжьэри яужь дитщ хьэщIэу къытхуэкIуэхэмрэ ди щIыналъэм щыпсэухэмрэ абыхэм кIуэ пэтми нэхъри зэрыдедгъэхьэхыным. Дэтхэнэ лъэпкъми щыщ цIыхум дежкIэ мыхьэнэ нэхъ зиIэу къэлъытапхъэр и нэмыс, и хабзэ, и бзэ и щIэгъэкъуэну гъащIэм ирикIуэнырщ. Лъэпкъым зэрызицIыхуж и гупсысэм и къежьапIэр анэм гущэкъу уэрэду зэхригъэхарщ, адэжьхэм къаIуэтэжу щыта хъыбархэрщ, гъэсэныгъи тхыдэ щIэныгъи хэлъу, унагъуэм щызекIуэ зэхэтыкIэ дахэрщ. АтIэми, дэ дызэреплъымкIэ, адыгэ лъэпкъым и щэнхабзэм и джэлэс нэхъыщхьэу къэлъытапхъэр бзэр, щэнхабзэр, ижькIэрэ къыддекIуэкI гупсысэкIэ-дуней хущытыкIэм лъабжьэ быдэ етту, а псори зэрытхъумэным тщыщ дэтхэнэри яужь дитын зэрыхуейрщ.
ХьэщIэхэм къазэрыщыхъуар
- МахуэщIым сыкъэкIуащ ди зэхуэдэ лэжьыгъэм, лъэпкъхэм я щэнхабзэр хъумэнымрэ зегъэужьынымкIэ IуэхущIафэхэр мы хэгъэгум зэрыщрагъэкIуэкIыр, къызэрыщаIэтыр зэзгъэщIэн, адыгэхэм я хабзэ-бзыпхъэхэм, бзэм, къэфэкIэм, уэрэд жыIэкIэм нэхъ гъунэгъу захуэсщIын хьисэпкIэ. Нэрылъагъущ, зи гугъу сщIахэр хэгъэгум хуэсакъыпэу зэрыщахъумэм и мызакъуэу, «гъуэгущIэ» тешэнымкIи зэрыщелIалIэр. Ар, дауи, хэкурысхэр зыгъэгушхуэщ. Пушкиным и унэм дыщыщIэтами дымыгъэщIэгъуэн тлъэкIакъым гъэлъэгъуэныгъэхэр къыщызэIуаха и бгъурыщIэ пэш Iэхуитлъэхуитым бзэ зэмылIэужьыгъуэ щыIуа пэтми, цIыхухэм ягъэнэхъапэу гу зылъыттар я зэхуаку дэлъ зэхущытыкIэ къабзэр, гуапагъэр зэрыарар, - къыхигъэщащ Ставрополь крайм Лъэпкъ политикэмрэ къэзакъхэм я IуэхухэмкIэ и министерствэм чэнджэщакIуэ къалэныр щызыгъэзащIэ Бекеновэ Екатеринэ.
Гъунэгъу щIыналъэм щыщ хьэщIэм жиIар зэрыщыпкъэр къыхигъэща иужь, бысымхэм захуигъазэу, Къэбэрдей-Балъкъэрым Лъэпкъ Iуэхухэмрэ жылагъуэ проектхэмкIэ и министерствэм и IэщIагъэлI пашэ Абазэ Динэ жиIащ:
– Мыбдежым къыщекIуэкIыр Налшык къикIахэр хуабжьу дызыгъэгушхуэщ. Фыкъызэрытхущытыр апхуэдизу къыдэхуэбылIэу дигу дыхьэщащи, дызыщыщ Къэбэрдей-Балъкъэрым дыщыIэрэ ди уни дисыж хуэдэу къэдвгъэлъытэжащ. КъэфIэта Iуэхухэри я къызэгъэпэщыкIэкIэ дахащэщ, къызэрымыкIуэуи купщIафIэщ. Щытлъэгъуари щызэхэтхари дэ, адыгэ псоми, ди зэхуэдэ щIэинщ, беягъэщи, щыгъуазэ дызыхуэфщIам дамыгъэпIейтеиныр Iэмал зимыIэщ...
Абазэ Динэ жиIам къыпытщэу къыхэдгъэщынщи, Адыгэ Республикэм къыщыдаха хьэщIагъэр абдежми щиухакъым. КъыкIэлъыкIуэ махуэм емыжьэжу къэнахэр нэгузыужь дашащ бгыщхьэхэмкIэ, Щхьэгуащэ къыхэлъэдэж Рыфыпс псы цIыкIум и къуэладжэм дахащэу щызэкIэлъыкIуэ псыкъелъэхэм гъунэгъу дыхуащIщ, дыбгъэдашэри, а щIыпIэм щызэкIэлъыхьа этнопаркым, адыгэхэм я тхыдэм, щэнхабзэм щыщ напэкIуэцIхэр щIыуэпсым хэту щагъэлъагъуэм, хъыбар гъэщIэгъуэнхэм дыщрагъэдэIуащ, а псом япэ къихуэу, ерыскъы гурыхьхэмкIэ узэда Iэнэ дэгъуэми дыпэрагъэсащ, хъуэхъу дахэ куэди щызэхыдагъэхащ...
Тхыгъэри сурэтхэри
КЪУМАХУЭ Аслъэн ейщ.