«РусГидро» компанияны Къабарты-Малкъарда бёлюмюню келечилери Нальчикде сокъурланы библиотекасыны гитче окъуучуларына китап саугъала бергендиле. Энчи жарашдырылгъан затланы ала Халаллыкъны халкъла аралы кюнюне атап, «Саугъагъа - китап» деген жандауурлукъ акцияларыны чеклеринде алып баргъандыла.
Алай бла бу библиотеканы хазнасы «Къыраллада эмда континентледе жолоучулукъ» деген китапла бла толуракъ болгъанды. Ала уа гитче окъуучуланы жер башында жашагъан миллетлени маданият байлыкълары бла шагъырейлендирликдиле. «Россейни халкъларыны жомакълары» да алагъа бек сейирли боллукъдула.
Саугъаланы ичлеринде «Тамашалы карандаш» деген электрон устройстволары барды. Аны китапны бетлеринде болгъан энчи затлагъа тийдирсе, ол музыка согъуп башларыкъды неда сейирли хапарла айтырыкъды. Китапланы бетлеринде ишленнген суратла да бек шатыкдыла, тюрсюнлюдюле, бир-бир затларын къол бла тийип сезерге да боллукъду. Ала бары да кёзлери осал кёрген сабийлеге таплыкъгъа деп этилгендиле.
«Биз, сабийле бла бирге бу тынгылы китапланы бек сюйюп хайырланырыкъбыз. Энчи сабий литература артыкъ алай кёп тюйюлдю. Аны себепли бу саугъаланы ала бек жаратырыкъларына мен ишексизме», – деп, библиотеканы башчысы Жанна Хамдохова энергетиклеге ыразылыгъын билдиргенди.
Гидроэнергетика компания, «Кёзлери осал кёрген сабийлеге тюрсюнлю китапла» деген жандауурлукъ фонд бла бирге «Саугъагъа -китап» программаны бардырып башлагъанлы оналты жыл болады. Быйыл аны быллай акциялары 21 регионда ётгендиле. Сагъынылгъан китапла сатыугъа тюшмейдиле, жаланда ма бу халда саугъагъа бериледиле.
Улбашланы Мурат.
