Белоруссием и къалащхьэм иджыблагъэ щекIуэкIащ Олимп джэгухэм алыдж-урым бэнэкIэмкIэ я чемпион Караваев Олег и фэеплъ дунейпсо зэхьэзэхуэ. Мы гъэм ар 27-нэрэ ирагъэкIуэкIащ. Урысей Федерацэм и командэ къыхэхам хэту Минск къалэм щыIащ Къэбэрдей-Балъкъэрым щыщ бэнакIуэ щIалиплI икIи абыхэм псоми ме­даль зэхуэмыдэхэр зэпеуэм къыщахьащ. 

Килограмм 55-рэ хъухэр зыхэт гупым я деж дыщэ медалыр щызыIэригъэхьащ Кабалоев Виталий. И IэзагъкIэ ефIэкIыу япэ зэIущIищыр и хьэрхуэрэгъухэм къафIихьри, кIэух зэхьэзэхуэм ар щебэнащ Узбекистаным и спортсмен лъэщ Ортикбоев Жасурбек. Абы гугъу дехьу къыфIихьащ ­зэпеуэр, бжыгъэр 2:1-уэ. Апхуэдэ щIыкIэкIэ, япэ дыщэ медалыр УФ-м и командэм къыхэхъуащ.
Кабалоевым иужькIэ КIэмпIарэ Мурат щытекIуащ килограмми 130-рэ зи хьэлъагъхэр щыбанэ гупым икIи абыи япэ увыпIэр къихьащ. КIэух зэхьэзэхуэм абы щыхигъэщIащ ди командэм щыщ бэнакIуэ Шишхов Юрэ. 
Килограмм 67-рэ хъухэр щызэпеуэ гупым етIуанэ увыпIэр къыщихьащ БищIо Астемыр, ардыдэм ещанэ щыхъуащ ГуIэжьей Iэдэм. 
Караваев Олег и фэеплъ дунейпсо зэхьэзэхуэм Урысей Федерацэм и командэм псори зэхэту медаль 17 къыщи­-хьащ, абыхэм ящыщу 6-р дыщэу икIи къэралхэм я зэпеуэм бжьыпэр щиубыдащ.
хьэщыкъуей  Олег.