Къабарты-Малкъар гуманитар-техника колледжни, «Правону сакълау эмда башчылыкъ этиу» билим бериу кластерни окъуучулары да  «Профессионалитет»  федерал проектге кёре  Москвагъа барып,  «Абилимпикс-2023» миллет чемпионатха  къатышхандыла. Андан къайтхандан сора, ала тенглери  бла тюбешгендиле.

Ушакъгъа  гуманитар-техника колледжде ишлеген Анзор Губжоков, чемпионатха къатышыргъа баргъанланы биргелерине болгъан эксперт- мастер  Мартьяна Балкизова, «Абилимпикс»  къымылдауну КъМР-де  арасыны башчысы Сатаней Курашинова, колледжни преподаватели Елена Хандогий, «Абилимпикс»  чемпионатны регион кесегини  «школчу» бёлюмюнде  хорлагъан Тимур Экашеев эм башхала къатышхандыла.  

Марьяна Балкизова  конкурсха къалай  къатышханларыны  юсюнден тынгылы хапар айтханды эмда экспертле бла бирге бардырылгъан кёп тюрлю тюбешиуле конкурсну кенгертиуге уллу себеплик этгенлерин чертгенди.

Сатаней Курашинова да Къабарты-Малкъарны окъуучуларын аллай эришиулеге жибериуню бек магъаналыгъа санагъанды, анга себеплик этгенлеге да жюрек ыразылыгъын билдиргенди. Бек алгъа КъМР-ни  Жарыкъландырыу эмда илму министерствосуна эмда  гуманитар-техника колледжни башчысы  Барасби  Абазовха ыспас этгенди. 

-Жашларыбызгъа бла къызларыбызгъа  миллет чемпионатха барыу, аны тюрлю-тюрлю маданият программаларына, усталыкъны ёсдюрюрча майданларына къатышыу, хорлам болдургъанла бла  тюбешиу, аладан юлгю алыу, кеслерине жангы шуёхла да табыу артыкъда магъаналыды. Биз да  ишибизни къурауну къыйматлы амаллары бла шагъырейленебиз, башха жерледен келген экспертле бла тюбешип, сынау жыйышдырабыз. Ансыз регионда быллай ишни  айнытыргъа къыйынды. Алгъа барыр ючюн къайры  атланнганынгы билирге керексе», - дегенди Сатаней Курашинова.

Тюбешиуню кезиуюнде кеслерини оюмларын  жаш адамла да айтхандыла. Миллет чемпионатха къатышып къайтханлагъа кёп соруула да бергендиле.

Далхатланы Марзият.