Псэ зыIуту ЩIым щыпсэухэм ящыщу цIыхум нэмыщI хыбжхэрщ (хыкхъуэкIи йоджэ дельфинхэм) цIэкIэ зэджэжыр. Ар къахутащ шотланд биологхэм.
Хыбжхэм ягъэIу макъымкIэ зэрощIэ. Хым хэс гупхэм ящыщу зэрихьэлIар зэрыцIыхуу щытмэ, фий-кIий макъышхуэ къоIу, ауэ зэрымыцIыхумэ, гу зылъамытэхха хуэдэу зэблосыкI. ЩIэныгъэлIхэм къахутащ псым хэс а псэущхьэхэр щысымаджэм, щымэжалIэм, щыпIейтейм, щышынэм деж ягъэIу макъхэр зэрызэщхьэщыкIыр.
Биологхэр щыхьэт зэрытехъуэмкIэ, хыбжхэр зэрызэпсалъэ щIыкIэм гъэщIэгъуэн куэд хэлъщ. Ахэр зэрыпсэлъакIуэм гу лъызыта шотланд биологхэм зрапщытащ абыхэм я «бзэр» зрагъэщIэну. Ахэр зэрызэпсалъэ щIыкIэр ирагъэтхри, езыхэм я нэIэ щIэт псэущхьэхэр ирагъэдэIуащ. КъызэрыщIэкIымкIэ, хыбжхэм жэуап щатыжыр езыхэм я цIэр (зыми емыщхь фий макъ) щызэхахым и дежщ. Апхуэдэ дыдэуи мы псэущхьэхэр цIыхухэм фIащ цIэ лейм йосэри, щеджэкIэ къокIуалIэ. Унагъуэ псэущхьэхэм къащхьэщыкIыу, хыбжхэм узэреджэ цIэр жаIэж.
Мы къэхутэныгъэр езыгъэкIуэкIхэм яз Яник Винсент жеIэ: «Хыбжхэр цIэ зырызкIэ щIызэджэжыр здэбгъэзэну лъэныкъуэр зыкIи къыщыхэмыгъэщхьэхукIа хым хэсщи аращ, зэрыгурыIуэгъуэщи, ахэр гупу зэрыIыгъын хуейщ. Ахэр зэрылъагъуркъым, мэкIи зэрыщIэркъым, абы къыхэкIкIэ, зэфIэмыкIуэдын щхьэкIэ макъ ягъэIун хуей мэхъу».